Hüseyn Qəhrəmanov: Gələcəkdə böyük idman zirvələrinə çatmağı qarşıma məqsəd qoymuşam
Bakı, 25 mart, AZƏRTAC
Gələcəkdə böyük idman zirvələrinə çatmağı qarşıma məqsəd qoymuşam. Avropa və dünya çempionu olmağı istəyirəm.
AZƏRTAC xəbər verir ki, bunu kişi idman gimnastikası üzrə 27-ci Azərbaycan birinciliyi və Bakı çempionatının iştirakçısı, gənc idmançı Hüseyn Qəhrəmanov deyib.
Bakı Gimnastika Məktəbini təmsil edən idmançı bildirib: “Bu, mənim Milli Gimnastika Arenasında iştirak etdiyim ilk yarışımdır. Arena böyük, parlaq və gözəldir. Mən çox şadam ki, burada yarışmaq imkanım oldu. Əminəm ki, bu turnir mənim üçün stimul olacaq və gələcəkdə bu təcrübə bəhrəsini verəcək”.
“İdman gimnastikasını sevirəm, ona görə də gərgin məşqlər mənim üçün heç də ağır yük deyil. Əksinə, onlar mənə böyük zövq verir. Azərbaycan birinciliyinə və Bakı çempionatına yaxşı hazırlaşmışam. Ümid edirəm ki, məşqçim mənim çıxışımdan razı qalacaq”, - deyə H.Qəhrəmanov əlavə edib.
Martın 26-dək davam edəcək yarışlarda “Ocaq Sport”, Bakı Gimnastika Məktəbi, Sumqayıt Olimpiya İdman Kompleksi, Sumqayıt İxtisaslaşdırılmış Olimpiya Ehtiyatları Uşaq Gənclər İdman Məktəbi və Balakəni təmsil edən 79 idmançı qüvvəsini sınayır.
Bölmənin digər xəbərləri
