İkili standartlar Demokratik Təsisatlar və İnsan Haqları Bürosu ilə əməkdaşlığa xələl gətirə bilər
Bakı, 5 dekabr, AZƏRTAC
Azərbaycanın xarici işlər naziri Elmar Məmmədyarov dekabrın 5-də Bazeldə ATƏT-in Demokratik Təsisatlar və İnsan Haqları Bürosunun direktoru Mixael Link ilə görüşüb.
Xarici İşlər Nazirliyinin mətbuat xidmətindən AZƏRTAC-a bildirilib ki, görüşdə Azərbaycan ilə ATƏT-in Demokratik Təsisatlar və İnsan Haqları Bürosu arasında əməkdaşlıq müzakirə olunub.
Elmar Məmmədyarov təsisat tərəfindən aparılan seçki monitorinqlərinin qərəzli olması, monitorinqlərin nəticələri ilə bağlı hazırlanan hesabatların sifariş əsasında verilməsinin və bu məsələlərdə ikili standartlar tətbiq etməsinin təşkilatla əməkdaşlığa və ona olan etimada xələl gətirə biləcəyini qeyd edib.
M.Link ölkələrlə əməkdaşlıqda maraqlı olduğunu bildirərək, həm seçki, həm də insan hüquqları kimi məsələlərdə ayrı-seçkiliyə yol verilməməsinin vacib amil olduğunu bildirib. O, qurumun gələcək fəaliyyəti zamanı bu iradların diqqət mərkəzində olacağını deyib. M.Link, həmçinin regiona səfər etmək niyyətində olduğunu qeyd edib.
Bölmənin digər xəbərləri
