“İlham Əliyev. İnkişaf - məqsədimizdir” çoxcildliyinin on səkkizinci cildi çapdan çıxıb
Bakı, 11 sentyabr (AZƏRTAC). “İlham Əliyev. İnkişaf -məqsədimizdir” çoxcildliyinin on səkkizinci cildi çapdan çıxıb.AZƏRTAC xəbər verir ki, nəşrin bu cildi Azərbaycan Respublikasının Prezidenti İlham Əliyevin Qara Dəniz Biznes Forumunun iştirakçılarına təbrik məktubu ilə açılır.
Prezident İlham Əliyevin təbrik məktubunda deyilir: “Şərqin və Qərbin qovuşuğunda yerləşən Azərbaycan tarixi İpək Yolu vasitəsilə Qara dəniz hövzəsi dövlətləri ilə çoxəsrlik ticarət əlaqələrinə malikdir. Qara dəniz hövzəsi, eyni zamanda, ölkəmizin Avropaya inteqrasiyasında da körpü rolunu oynayır. Təsadüfi deyil ki, keçən əsrin sonlarında Qara dəniz və Xəzər dənizi hövzəsində yerləşən ölkələrin inkişafına dəstək və onların arasında əməkdaşlığın gücləndirilməsi məqsədilə yaradılan Qara Dəniz Ticarət və İnkişaf Banklı çox qısa dövr ərzində sürətlə inkişaf edərək ən nüfuzlu regional təşkilatlardan birinə çevrilmişdir. Azərbaycan Respublikası regionda iqtisadiyyatın ayrı-ayrı sahələrinin inkişafına dəstək verən və vacib layihələrin maliyyələşdirilməsində fəal iştirak edən Qara Dəniz Ticarət və İnkişaf Bankı ilə əməkdaşlığa xüsusi diqqət yetirir”.
Azərbaycan Respublikasının Prezidenti Administrasiyasının rəhbəri, akademik Ramiz Mehdiyevin buraxılışına məsul olduğu çoxcildliyin oxuculara təqdim olunan on səkkizinci cildində Prezident İlham Əliyevin Azərbaycan tarixinin ən yeni dövrünün çox mühüm və əhəmiyyətli hadisəsi olan Heydər Əliyev adına Bakı-Tbilisi-Ceyhan əsas neft ixrac boru kəmərinin istismara verilməsinə həsr olunmuş mərasimdəki nitqi, Avropanın, ümumiyyətlə, dünyanın bir çox ölkələri ilə siyasi, iqtisadi, elmi-mədəni və digər sahələrdə uğurlu əməkdaşlığa dair çıxışları verilib.
Kitabda Prezident İlham Əliyevin ölkəmizdə ətraf mühitin mühafizəsi, regionların sosial-iqtisadi yüksəlişi, gənc nəslin milli-mənəvi dəyərlərə bağlılığı və intellektual səviyyəsinin yüksəldilməsi, idmanın inkişafı, həmçinin ictimai-siyasi həyatın digər məsələləri ilə bağlı çıxışları və nitqləri geniş yer tutur.
On səkkizinci cilddə, həmçinin Prezident İlham Əliyevin Azərbaycana səfərə gələn bir sıra dövlət və hökumət başçıları, beynəlxalq təşkilatların nümayəndələri ilə görüşləri, kütləvi informasiya vasitələrinə verdiyi müsahibələri və Dağlıq Qarabağ münaqişəsinin nizama salınması ilə əlaqədar ölkəmizin prinsipial mövqeyinə dair fikirləri əksini tapıb.
Kitaba “Qeydlər”, “Şəxsi adlar”, “Coğrafi adlar” göstəriciləri də daxil edilib.
Çoxcildliyin bu kitabına daxil olan materiallar 2006-cı ilin iyunundan avqustunadək olan dövrü əhatə edir.
“Azərnəşr” tərəfindən buraxılmış on səkkizinci cildin hazırlanmasında Azərbaycan Dövlət Teleqraf Agentliyinin (AZƏRTAC-ın) materiallarından istifadə olunub.
Bölmənin digər xəbərləri
