İndi bütün yollar Qarabağdan keçir
Bakı, 18 mart, AZƏRTAC
Martın 15-də Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva Füzuli və Xocavənd rayonlarında oldular. Müzəffər Ali Baş Komandan yenə çox önəmli mesajlar verdi. Uğursuz dövlət olan Ermənistanda üzdəniraq qüvvələrin Azərbaycandan əvəzçıxma çağırışlarının səsləndirdiyi bir vaxtda bu səfər köksümüzü qabardır, bizi qürurlandırır.
Bunu AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva deyib.
Q.Paşayeva qeyd edib ki, Azərbaycan Prezidenti İlham Əliyev görkəmli alim, arxeoloq Məmmədəli Hüseynovun 1960-cı ildə aşkar etdiyi, dünyanın ən qədim insanının yaşayış məskənlərindən olan Azıx mağarası ilə bağlı səsləndirdiyi fikirlər hər birimizi qürurlandırır: “Biz bu zirvəni qət etmişik. Bütün zirvələri qət edəcəyik. Elə zirvə yoxdur ki, onu biz qət edə bilməyək. Gəlin, bir yerdə deyək: “Azıx Azərbaycandır!”, “Qarabağ Azərbaycandır!”.
Prezident İlham Əliyevin tarixdə hər zaman Azərbaycanın olmuş və olacaq Qarabağa səfəri, səfər çərçivəsində qaldırılan üçrəngli bayraq, çəkilən yollar, təməlqoymalar və digər tədbirlər dünəndən sabaha, bu gündən böyük gələcəyə uzanan yollardır, yeni istiqamətdir. Sanki tarixlə gələcəyin görüşü bu günlərdə olduğu qədər heç zaman belə əyani, belə böyük tabloda görünməmişdi. Qarabağ həqiqət meydanıdır”.
Komitə sədri vurğulayıb ki, tarixə qızıl xətlə yazılan və 2020-ci il sentyabrın 27-dən bəri konkret həqiqət meydanı, müqayisə imkanı qazanmış beynəlxalq birlik dünya erməniliyinin astarının üzündən betər olduğunu, iç üzünü təkzibolunmaz şəkildə görür, görməlidir. Azərbaycan Prezidentinin düşünülmüş siyasəti ilə dünya həqiqətin sərt üzü ilə qarşılaşır. Azərbaycan Prezidenti də vurğuladığı kimi, indi gəlsinlər görsünlər illər uzunu kimi müdafiə ediblər?!
“Müzəffər Ali Baş Komandan budəfəki səfərində bir daha xatırlatdı ki, 44 günlük Vətən müharibəsi ilə Azərbaycan Ordusu öz şərəfli missiyasını yerinə yetirib, Azərbaycan Ordusu və Azərbaycan xalqı məhz tarixi ədaləti bərpa edib. Bizim ordumuz mülki əhaliyə qarşı müharibə aparmayıb və Hadrut qəsəbəsinin işğaldan azad olunması Vətən müharibəsində əldə olunan qələbədə böyük rol oynayıb. Dövlətimizin başçısı Hadrut əməliyyatının dünyanın hərb elmində xüsusi yer tutacağını dedi və bildirdi ki, bütövlükdə 44 günlük şanlı müharibəmiz, bizim Zəfərimiz bu gün dünyanın aparıcı ali məktəblərində öyrənilir və artıq hərbi ekspertlər, mütəxəssislər, hətta bir çox ölkələrin siyasətçiləri bunun XXI əsrin müharibəsi olduğu qənaətindədirlər”,- deyə Qənirə Paşayeva bildirib.
Deputatın sözlərinə görə, müharibə Azərbaycan və Ermənistan arasında olan fərqi bir daha dünyaya aşkar şəkildə nümayiş etdirdi. Vətən müharibəsi bir daha dünyaya göstərdi ki, Azərbaycan bütün xalqların tarixinə, dininə və mədəniyyətinə hörmət edən, Ermənistan isə monoetnik dövlətdir. Hər zaman tarixi faktların saxtalaşdırılması rəsmi İrəvanın dövlət siyasətinin əsasını təşkil edir. Bütün bunlar onu deməyə əsas verir ki, Ermənistan uğursuz bir dövlətdir. Qarabağın altını üstünə çevirmək üçün əlindən gələni edən bu ölkənin və dövlətin axırı yoxdur.
Bölmənin digər xəbərləri
