Hörmətli iclas iştirakçıları!

Xalqımızın ümummilli lideri Heydər Əliyevin rəhbərliyi ilə başlanmış sosial-iqtisadi inkişaf strategiyasının bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilməsi nəticəsində iqtisadiyyatın inkişafı sürətlənir, əhalinin həyat səviyyəsinin yüksəldilməsi üçün əhəmiyyətli işlər görülür. Beynəlxalq maliyyə təsisatlarının rəyinə görə, keçid iqtisadiyyatlı ölkələr arasında Azərbaycan ən dinamik inkişaf edən ölkədir.

Ötən illərdə olduğu kimi, bu ilin doqquz ayında da yüksək inkişaf sürəti davam etmiş və ümumi daxili məhsulun həcmi keçən ilin müvafiq dövrü ilə müqayisədə 21,8 faiz artmışdır. Belə yüksək inkişaf sürəti bir tərəfdən, uğurlu neft strategiyasının həyata keçirilməsi, neft hasilatının və buna müvafiq olaraq ixracının artması ilə bağlıdırsa, digər tərəfdən, cənab Prezidentin rəhbərliyi altında qeyri-neft sahələrinin inkişaf etdirilməsinə yönəlmiş siyasətin real nəticəsidir.

Doqquz ayın yekunlarına görə, neft sektorunda artım 54,5 faiz, qeyri-neft sahələrində isə 8 faiz səviyyəsində olmuşdur. Ümumiyyətlə, cari ilin ötən dövrü ərzində istehsal sahələrində artım 30,7 faiz, xidmət sahələrində isə təxminən 9 faiz təşkil etmişdir. Ölkəmizin davamlı inkişafında ən mühüm və həlledici amil sərmayə qoyuluşlarının artmasından, onun strukturunun təkmilləşdirilməsindən ibarətdir. Fərəhləndirici haldır ki, indi adambaşına düşən sərmayələrin həcminə görə Azərbaycan MDB və Şərqi Avropa ölkələri arasında ilk yerlərdən birini tutur. Doqquz ayın yekunları göstərir ki, sərmayələrin həcmi ötən ilin müvafiq dövrü ilə müqayisədə təxminən 11 faiz, o cümlədən daxili sərmayələrin həcmi 36,5 faiz artmışdır.

İqtisadiyyatın regional baxımdan tarazlı inkişafına yönəldilmiş regionların sosial-iqtisadi inkişafı Dövlət Proqramı cənab Prezidentin daimi diqqəti və nəzarəti nəticəsində uğurla yerinə yetirilir. Bütün rayonlarda yeni-yeni müəssisələr və sosial obyektlər fəaliyyətə başlayır. Təsadüfi deyil ki, Proqram qəbul edildikdən sonra yaradılmış yeni iş yerlərinin sayı 300 mini keçmişdir. İnkişaf sürətini nəzərə alsaq, tam əminliklə demək olar ki, cənab Prezident tərəfindən qarşımıza qoyulan vəzifə - 600 min iş yeri yaratmaq vəzifəsi çox asanlıqla yerinə yetiriləcəkdir.

Regionların inkişafı xeyli dərəcədə infrastruktur təminatına, əhalinin kommunal xidmətlərinə olan ehtiyacın ödənilməsindən ibarətdir. Son dövrlər bu sahələrdə idarəetmənin təkmilləşdirilməsi, habelə mühüm layihələrin həyata keçirilməsi ilə bağlı sərəncamların imzalanması, gələn il dövlət investisiya xərclərinin əhəmiyyətli dərəcədə artırılması yaxın gələcəkdə bu sahədə mövcud olan problemlərin tamamilə həll edilməsinə əlverişli zəmin yaradır.

Hörmətli iclas iştirakçıları!

Əsası ümummilli liderimiz Heydər Əliyev tərəfindən qoyulmuş sahibkarlığa dövlət himayəsi siyasəti bu gün də ardıcıl şəkildə davam etdirilir. Cari ildə sahibkarlıq subyektlərinə dövlət büdcəsindən 200 milyard manat məbləğində güzəştli kredit verilmişdir. Gələn il bu vəsaitin həcminin 2 dəfə artırılaraq, 400 milyard manata çatdırılması nəzərdə tutulur. Bu isə 90 milyon ABŞ dolları deməkdir. Bununla yanaşı, fermerlərin texnika və gübrə ilə təmin edilməsinə böyük həcmdə vəsaitlər ayrılır. Məhz sahibkarlığın inkişaf etdirilməsinin və özəlləşdirmənin aparılmasının nəticəsidir ki, ümumi daxili məhsulda qeyri-dövlət bölməsinin xüsusi çəkisi durmadan artır və bu ilin sonuna 77 faizə çatması gözlənilir.

Ölkəmizin iqtisadi qüdrəti və maliyyə imkanları möhkəmləndikcə, əhalinin həyat səviyyəsinin yüksəldilməsi üçün əlverişli zəmin yaranır. Minimum əmək haqqı, pensiya və müavinətlər davamlı olaraq artırılır. Məhz belə siyasətin nəticəsidir ki, bu ilin doqquz ayında orta aylıq əmək haqqı 22 fazi artaraq, 577 min manat təşkil etmişdir. Bununla yanaşı, antiinflyasiya tədbirlərinin gücləndirilməsi haqqında Fərmana uyğun olaraq görülən işlər də ailənin real gəlirlərinin yüksəlməsinə öz töhfəsini verir. Qeyd olunan tədbirlər yoxsulluğun azaldılması və iqtisadi inkişaf Dövlət proqramı ilə müəyyən edilmiş məqsədlərin reallaşdırılmasını təmin edir və məlum olduğu kimi, yoxsulluğun səviyyəsi 49 faizdən 40 faizə enmişdir.

Bu siyasətin davam etdirilməsi məqsədi ilə cənab Prezidentin Sərəncamına uyğun olaraq, 2015-ci ilədək olan müddət üçün yoxsulluğun azaldılması və davamlı inkişaf Dövlət proqramı hazırlanmaqdadır. Bu proqram Birləşmiş Millətlər Təşkilatının qəbul etdiyi Minilliyin İnkişaf Məqsədlərinin Azərbaycanda reallaşdırılmasını təmin edəcəkdir.

Məlum olduğu kimi, Azərbaycan dövlətinin apardığı sosial-iqtisadi siyasətin ən mühüm istiqamətlərindən biri ölkəmizin dünya iqtisadi sisteminə inteqrasiyasını sürətləndirməkdən ibarətdir. Əvvəlki illərdə olduğu kimi, bu ilin ötən dövrü ərzində də beynəlxalq maliyyə təsisatları və iqtisadi təşkilatlarla əməkdaşlıq davam etdirilmiş və birgə layihələr həyata keçirilmişdir. İkitərəfli ticarət əlaqələri də inkişaf etmiş, barter ölkələrinin sayı 132-yə çatmışdır. Ötən ilin müvafiq dövrü ilə müqayisədə xarici ticarət dövriyyəsi 22 faiz, o cümlədən ixrac 14,5 faiz, idxal isə 28 faiz artmışdır. Ən mühüm cəhətlərdən biri bu il qeyri-neft məhsulları ixracı həcminin 58,3 faiz artmasıdır ki, bu da bayaq dediyim kimi, sahibkarlığın, özəl sektorun inkişafının real nəticəsidir.

Hörmətli iclas iştirakçıları, yuxarıda sadalanan uğurların daha da möhkəmləndirilməsi üçün cənab Prezidentin müəyyən etdiyi siyasətə uyğun olaraq, qarşıdakı illərdə iqtisadi qanunvericiliyin təkmilləşdirilməsi, qeyri-neft sahələrində rəqabət qabiliyyətli məhsul istehsalının artırılması, kommunal sektorda islahatların davam etdirilməsi, dolayı subsidiyaların azaldılması, maliyyə intizamının gücləndirilməsi, dövlət proqramlarının idarə edilməsinin səmərəliliyinin artırılması, sahibkarların dəstəklənməsi mexanizminin təkmilləşdirilməsi, əmək haqqı və pensiyaların səviyyəsinin tədricən yaşayış minimumuna çatdırılması nəzərdə tutulur. Bununla yanaşı, biz beynəlxalq maliyyə təsisatları ilə əməkdaşlığın da keyfiyyətcə yeni mərhələyə qaldırılmasını, Dünya Ticarət Təşkilatına üzv olmaq prosesinin sürətləndirilməsini, ikitərəfli əlaqələrin həcminin və coğrafiyasının genişləndirilməsini əsas vəzifələrimiz kimi müəyyən etmişik.

Cənab Prezident, çıxışımın sonunda bu çox da sadə olmayan bir dövrdə - yaramazların, cinayətkarların baş qaldırdığı bir dövrdə mənə göstərdiyiniz yüksək etimada görə təşəkkürümü bildirirəm. Sizi əmin edirəm ki, verdiyiniz tapşırıqların layiqincə yerinə yetirilməsi üçün bütün imkanlarımızı səfərbər edəcəyik. Hazırda MDB ölkələrinin və Orta Şərq ölkələrinin gördüyü tədbirlər, o cümlədən, ümumiyyətcə hamımızı maraqlandıran antiinflyasiya tədbirləri göstərir ki, bu ölkələrin çoxu Azərbaycanda olan təcrübəni əsas kimi qəbul edirlər. Son günlər Rusiyada keçirilən müşavirələr, Rusiya hökuməti tərəfindən qəbul olunan qərarlar göstərir ki, məhz Sizin həyata keçirdiyiniz siyasəti tətbiq edirlər.

Bütün kollektivimiz adından Sizi Ramazan bayramı münasibətilə təbrik edirəm və əmin edirəm, biz əlimizdən gələni edəcəyik ki, Sizin tapşırıqlarınızı çox keyfiyyətli, qabiliyyətli bir icraçı kimi həyata keçirək.

Diqqətinizə görə çox sağ olun.

X X X

Sonra vergilər naziri Fazil Məmmədova söz verildi.