İQTİSADİ İNKİŞAF NAZİRLİYİNİN MƏLUMATI
Azərbaycan Respublikası Prezidentinin 9 dekabr 1999-cu il tarixli Fərmanı ilə təsdiq edilmiş “Azərbaycan Respublikasında dövlət əmlakının registri haqqında Əsasnamə”yə uyğun olaraq İqtisadi İnkişaf Nazirliyinin Dövlət əmlakının özəlləşdirilməsi departamenti ölkədə daşınmaz dövlət əmlakı barədə məlumatların toplanmasını, təhlil olunmasını və onların Avtomatlaşdırılmış Milli Əmlak Sisteminə daxil olunması işini davam etdirir.
2001-ci ilin sentyabrından tətbiq edilən Avtomatlaşdırılmış Milli Əmlak Sistemi daşınmaz dövlət əmlakı barədə dolğun məlumatlara malik informasiya bazasının yaradılmasına, ayrı-ayrı sahələr arasında məlumat mübadiləsinin sürətləndirilməsinə imkan vermişdir.
1 aprel 2002-ci il tarixə Azərbaycanda və onun hüdudlarından kənarda yerləşən 13500-dən artıq dövlət müəssisə və təşkilatının 93000-dən çox daşınmaz əmlakı Mərkəzi registrdə qeydiyyata alınmışdır.
Bundan başqa, nizamnamə kapitalında dövlət payı olan 1017 səhmdar cəmiyyətinin daşınmaz əmlakı barədə məlumatlar da registrə daxil edilmişdir.
Avtomatlaşdırılmış Milli Əmlak Sisteminin tətbiqi nəticəsində dövlət müəssisəsinin səhmdar cəmiyyətinə çevrilməsi zamanı özəlləşdirmə planına daxil edilməyən obyektlərin (sosial təyinatlı obyektlər, yarımçıq tikililər, müəssisə ilə texnoloji bağlılığı olmayan obyektlər və s.) dəqiq uçotunun aparılmasına imkan yaranmışdır. İndiyədək 1084 belə obyekt registrdə qeydə alınmışdır.
İnformasiya bazasına həmçinin, respublika ərazisində olan 1977 yarımçıq tikili barədə məlumatlar da daxil olunmuşdur.
2002-ci ilin ötən dövrü ərzində nazirliyin Dövlət əmlakının özəlləşdirilməsi departamentinə daxil olmuş məlumatların Mərkəzi registrin bazasına daxil edilməsi davam etdirilmişdir. Bu il 1997-ci ildən indiyədək icarəyə verilmiş 12300 obyekt barədə məlumatlar Mərkəzi registrə daxil edilmişdir.
Daşınmaz dövlət əmlakı üzərində baş verən dəyişikliklər, onların mülkiyyət mənsubiyyətinin dəyişməsi, icarəyə götürülməsi və s. barədə mütəmadi olaraq informasiya bazasında müvafiq düzəlişlər aparılır.
Avtomatlaşdırılmış Milli Əmlak Sistemində toplanmış məlumatlar müəssisə və obyektlər barədə operativ informasiya əldə olunmasında, onların özəlləşdirmə perspektivliyinin araşdırılmasında olduqca əhəmiyyətlidir.
Bölmənin digər xəbərləri
