İqtisadiyyat İnstitutunun 65 illik yubileyi qeyd olunub
Bakı, 15 aprel, AZƏRTAC
Elm və Təhsil Nazirliyinin İqtisadiyyat İnstitutunun yaradılmasının 65 illiyi münasibətilə tədbir keçirilib.
Bu barədə AZƏRTAC-a institutdan məlumat verilib. Tədbiri giriş sözü ilə açan İqtisadiyyat İnstitutunun baş direktoru iqtisadiyyat elmləri doktoru professor Nazim Müzəffərli müəssisənin yaranması tarixindən, keçdiyi şərəfli inkişaf yolundan, Azərbaycan iqtisad elminə və ölkə iqtisadiyyatına verdiyi töhfələrdən, apardığı fundamental tədqiqatlardan danışıb. Bildirib ki, müstəqillik illərində İqtisadiyyat İnstitutu Azərbaycanın müstəqil milli iqtisadiyyatının formalaşdırılması və inkişafı istiqamətində uğurlu və sanballı elmi-tədqiqat işləri yerinə yetirib, peşəkar milli kadrların yetişdirilməsində mühüm xidmətlər göstərib. Azərbaycanda fundamental elm mərkəzi olmaqla ölkədə tanınmış iqtisadçılar nəsli yetişdirib.
Nazim Müzəffərli qeyd edib ki, institut dövlət başçısı tərəfindən təsdiq olunmuş dövlət proqramlarının və Nazirlər Kabinetinin qərarlarının icrası ilə bağlı müvafiq dövlət qurumları ilə sıx əməkdaşlıq edir, onların sifarişlərini yerinə yetirir və birgə tədqiqatlar aparır. Habelə ölkənin aparıcı universitetləri ilə elm və təhsilin inteqrasiyası məqsədilə birgə layihələr həyata keçirir. İnstitutun əməkdaşları hökumət qurumlarının iqtisadiyyatla bağlı 10-dan artıq işçi qruplarında ekspert qismində təmsil olunurlar. Qarabağda yeni iqtisadiyyat quruculuğu sahəsində institutun apardığı tədqiqatlar dövlət tərəfindən yüksək qiymətləndirilir. İqtisadiyyat İnstitutu Azərbaycan iqtisad elminin flaqmanı kimi öz üzərinə düşən missiyasını bundan sonra daha da irəli aparmaq əzmindədir.
Baş direktor 65 illik yubiley münasibətilə institutun yaşı 70-dən yuxarı olan 11 əməkdaşına uzunmüddətli elmi fəaliyyətlərinə görə fəxri diplomlar təqdim edib.
İclasda AMEA-nın müxbir üzvü professor Şahbaz Muradov, akademik Ziyad Səmədzadə, Auditorlar Palatasının sədri Vahid Novruzov, elm və təhsil nazirinin müşaviri Nicat Məmmədli, Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov, Sumqayıt Dövlət Universitetinin professoru Şəfa Əliyev, Azərbaycan Memarlıq və İnşaat Universitetinin kafedra müdiri Məhəbbət Məmmədov çıxış edərək İqtisadiyyat İnstitutunun Azərbaycanda iqtisad elminin inkişafındakı rolu, mövqeyi və əhəmiyyətindən danışıblar. Çıxış edənlər institutun fəaliyyətini yüksək qiymətləndirib.
Qeyd edək ki, institutun əsas fəaliyyət istiqamətləri Azərbaycanın müstəqil milli iqtisadiyyatının sosial-iqtisadi inkişaf problemlərinin fundamental tədqiqidir. Azərbaycanda fundamental və tətbiqi iqtisadi araşdırmaların əsas mərkəzlərindən biri olan İqtisadiyyat İnstitutunda hazırda “Orta və uzunmüddətli dövrdə Azərbaycanda sosial-iqtisadi inkişafın milli prioritetlərinin reallaşdırılması istiqamətləri (2022-2025-ci illər)” mövzusunda tədqiqatlar aparılır. İnstitut öz tədqiqatlarında dövlət proqramlarının, strategiya və konsepsiyaların qarşıya qoyduğu məqsəd və vəzifələri əsas tutur. İnstitutun elmi-tədqiqat istiqaməti Azərbaycan Respublikasının Prezidenti tərəfindən təsdiq olunmuş “Azərbaycan 2030: sosial-iqtisadi inkişafa dair Milli Prioritetlər”ə, eləcə də “AMEA 2020-2025-ci illər üçün inkişaf proqramına” uyğun olaraq müəyyənləşdirilib.
İqtisadiyyat İnstitutunun əməkdaşları tərəfindən ölkələrarası və regionlararası müqayisələrə əsaslanan 4 reytinq araşdırmaları aparılıb. Bu reytinqlər institutun özünün təklif etdiyi metodologiya əsasında hazırlanıb. Nəticələr praktik idarəetmə qərarları qəbul edilərkən, sosial-iqtisadi inkişaf proqramları tərtib olunarkən, rayonların inkişafına əlavə dövlət vəsaitləri ayrılarkən istifadə oluna bilər.
Son 20 ildə institutda aparılan elmi-tədqiqat işlərinin nəticələri ilə bağlı əməkdaşlar tərəfindən 150-dən çox monoqrafiya, 3000 məqalə, o cümlədən 800-ə yaxın əsər xaricdə nəşr olunub. Təkcə 2022-ci ildə institutun əməkdaşları tərəfindən 268 əsər, o cümlədən 14 monoqrafiya, 5 dərslik və elmi-kütləvi nəşr, 140 məqalə, 100-dən artıq tezis çap olunub. Beynəlxalq elmi bazalara (“Web of Scinece”, “Scopus” və s.) daxil olan jurnallarda 14 məqalə, ümumilikdə isə xaricdə 44 əsər nəşr edilib. İl ərzində institutun 50-yə yaxın əməkdaşı 15 elmi konfransda iştirak edib. İnstitutun “İqtisadi artım və ictimai rifah” elmi jurnalı çap olunur.
Bölmənin digər xəbərləri
