DÜNYA
İRAN REGİONDA TƏHLÜKƏSİZLİK MƏSƏLƏLƏRİNDƏ TÜRKİYƏ İLƏ DAİM ƏLAQƏ SAXLAMAĞA TƏRƏFDARDIR
AZƏRTAC-ın Tehrandan aldığı xəbərə görə, bunu İran İslam Respublikasının Prezidenti Məhəmməd Xatəmi burada səfərdə olan Türkiyənin xarici işlər naziri və Baş nazirin müavini Abdullah Gül ilə görüşdə bəyan etmişdir.
Görüşdə İraqda vəziyyətə də toxunulmuşdur. Xatəmi vurğulamışdır ki, “İraqda demokratik hökumət yaradılması təkcə iraqlıların deyil, həm də bütün regionun, hətta koalisiya qüvvələrinin mənafelərinə uyğun olacaqdır”. İran Prezidentinin fikrincə, “qonşu İraqda idarəçiliyi xalq tərəfindən seçilən hökumət ölkənin ərazi bütövlüyünün və bütün etnik və dini qrupların birliyinin qorunub saxlanması şərtilə demokratik prinsiplər əsasında həyata keçirməlidir”.
Türkiyə xarici siyasət idarəsinin başçısı öz ölkəsinin İranla əlaqələri siyasi, iqtisadi sahələrdə və təhlükəsizlik məsələlərində qarşılıqlı hörmət əsasında genişləndirməyə hazır olduğunu bildirmişdir.