İRAQDA MƏHBUSLARA İŞGƏNCƏLƏR VERİLMƏSİ DAVAM EDİR
Hüquq müdafiəçilərinin məlumatına görə, minlərlə iraqlı heç bir ittiham irəli sürülmədən həbsxanalarda saxlanılır. 200-dən çox adam artıq iki ildir zindandadır, onlar nədə ittiham edildiklərini hələ də bilmirlər. Daha 4 min məhbus bir ildən çoxdur ki, istintaqın başlanacağını və ya heç olmasa, ittihamın açıqlanacağını gözləyir.
Təşkilatın Britaniya şöbəsinin direktoru xanım Keyt Allen demişdir: “Əsas hüquqlara riayət edilmədən bu qədər adamın həbsxanalarda saxlanılması ABŞ və Böyük Britaniya silahlı qüvvələri tərəfindən ciddi nizam-intizam pozuntusudur. Biz “Əbu-Qreyb” həbsxanası ilə bağlı rüsvayçılığın bir xeyri olmadığının əlamətlərini görürük”.
“Beynəlxalq amnistiya” ekspertlərinin fikrincə, İraq həbsxanalarında məhbuslara işgəncələr verilməsinin davam etdirildiyi barədə son vaxtlar getdikcə daha çox məlumat alınır. Keçmiş məhbuslar demişlər ki, onları döyür, elektrik şoku ilə işgəncələr verirdilər.
Bağdadın Qədimiyyə rayonundakı istintaq təcridxanasında saxlanılmış 47 yaşlı imam Kərim R. təşkilatın nümayəndələrinə bildirmişdir ki, birinci dəfə 2003-cü ildə həbs edilmiş və o vaxt ona amerikalılar işgəncə vermişlər. 2005-ci ildə o, İraqın təhlükəsizlik qüvvələri tərəfindən həbs olunmuşdur. Hər iki halda onu heç bir ittiham irəli sürmədən azadlığa buraxmışlar.
ABŞ-ın İraq ərazisindəki həbs-istintaq müəssisələrinin nümayəndəsi “Beynəlxalq amnistiya” təşkilatının məruzəsi ilə əlaqədar bildirmişdir ki, bütün məhbuslarla beynəlxalq konvensiyaların və İraq qanunlarının tələblərinə müvafiq surətdə rəftar olunur.
Bölmənin digər xəbərləri
