AZƏRTAC xəbər verir ki, Qətərin “Əl-Cəzirə” telekanalının yaydığı məlumata görə, Bağdadda hökumətin birdən-birə iki nazirinə qarşı sui-qəsd törədilmişdir. Maarif naziri Sami əl-Müzəffər maşınla işə gedərkən terrorçular onun evinin yaxınlığında dayanan minalanmış avtomobili partlatmışlar.

Digər partlayış isə ətraf mühitin mühafizəsi məsələləri naziri Mişkət Muminin avtomobilinin keçdiyi yolda baş vermişdir. Dörd mühafizəçi naziri ölümdən xilas edə bilmiş, özləri isə həlak olmuşlar. Yoldan keçən bir neçə nəfər yaralanmışdır.

Nazirlərin heç biri xəsarət almamışlar.

“Hüseynin briqadaları” qruplaşması bəyan etmişdir ki, intiharçı yaraqlıların “amerikalılara və onların əlaltılarına qarşı” hücumları başlanır. Bəyanatda deyilir ki, müqəddəs Ən-Nəcəf şəhərində hərbi əməliyyatların dayandırılması ilə əlaqədar islamçıların ABŞ-a və Əllavi hökumətinə verdikləri 48 saatlıq ultimatumun vaxtı bitmişdir.