İrəvanda qazandıqları qələbələrini Azərbaycana həsr etmiş türk atletlər ölkəmizə gəliblər
Bakı, 27 aprel, AZƏRTAC
İrəvanda ağırlıqqaldırma üzrə Avropa çempionatında mükafat qazanan və qələbələrini Azərbaycana həsr edən türk idmançılar Azərbaycan Prezidenti İlham Əliyevin tapşırığına əsasən Azərbaycana dəvət olunublar.
AZƏRTAC xəbər verir ki, nümayəndə heyətinə Avropa çempionları Nuray Güngör, Cansu Bekdaş, Yusuf Fehmi Genc, Avropa çempionatının gümüş mükafatçısı Qamze Altun və Türkiyə Ağır Atletika Federasiyasının prezidenti Talat Ünlü daxildir.
Heydər Əliyev Beynəlxalq Aeroportunda türk idmançıların qarşılanma mərasimi olub. Mərasimdə Gənclər və İdman Nazirliyinin nümayəndələri, Azərbaycan Ağır Atletika Federasiyasının nümayəndələri, media mənsubları, azarkeşlər, Azərbaycan və Türkiyə ictimaiyyətinin nümayəndələri iştirak ediblər.
Qeyd edək ki, aprelin 14-də Ermənistanın paytaxtı İrəvan şəhərində ağır atletika üzrə Avropa çempionatının açılış mərasimində Azərbaycan Bayrağı rəsmi akkreditasiya olunmuş şəxs tərəfindən nümayişkaranə şəkildə yandırılıb. Bu hadisə ilə əlaqədar olaraq ağırlıqqaldırma millimiz yarışda iştirakından imtina edib və onların İrəvandan Azərbaycana qayıtması barədə qərar verilib.
Təxribatla bağlı Gənclər və İdman Nazirliyi və Milli Olimpiya Komitəsi birgə bəyanat yayıb.
Həmçinin idman mediasının nümayəndələri İrəvanda ölkəmizə qarşı törədilən təxribatı sərt qınayıblar. Bu hadisə ilə bağlı Azərbaycan İdman Jurnalistləri İctimai Birliyi Beynəlxalq Ağır Atletika Federasiyasına və Beynəlxalq İdman Jurnalistləri Assosiasiyasına bəyanat göndərib.
Qeyd edək ki, türk idmançılar yüksək ustalıq, əzmkarlıq və iradə nümayiş etdirərək dünya miqyasında Türkiyə bayrağını dalğalandırmaqları, İstiqlal Marşını səsləndirmələri bütün Azərbaycan xalqını sevindirmişdi.
Bakıya dəvətə görə Prezident İlham Əliyevə və xanımı Mehriban Əliyevaya təşəkkür edən Avropa çempionatında qızıl medal qazanan türk ağırlıqqaldıran Cansu Bektaş deyib: “Azərbaycan xalqını çox sevirəm. İrəvanda qazandığım medalımı Azərbaycana həsr etdim. Dostum Nazilə İsmayılovaya söz vermişdim. Sözümü tutduğum üçün də sevinirəm”.
Qitə birinciliyinin gümüş mükafatçısı Qamze Altun medal qazandığı və bunu Azərbaycana həsr etdiyi üçün qürurlu olduğunu diqqətə çatdırıb: “Dəvət üçün Prezident İlham Əliyevə və xanımı Mehriban Əliyevaya təşəkkür edirəm. Bu uğur hamımızın haqqıdır. Bizi buraya gətirdiyi üçün Türkiyə Ağır Atletika Federasiyasının prezidenti Talat Ünlüyə də minnətdaram. Qarşılama mərasimi üçün isə idman azarkeşlərinə təşəkkür edirəm”.
Avropa çempionatında iki qızıl, bir bürünc medal qazanan Nuray Güngör bildirib: “Ermənistanda bir millət, iki dövlət olduğumuzu göstərdim. Bu, bir daha Azərbaycan və Türkiyə qardaşlığının parlaq nümayişidir. Orada Azərbaycana qarşı olan hörmətsizlik bizə də edilmiş sayılır. Azərbaycan yığması bayraq yandırılması hadisəsindən sonra yarışı tərk etməli oldu. Dedim ki, onlar yoxdurlarsa, biz varıq. Ən gözəl cavabımız Dövlət Himnimizin səslənməsi oldu. Bunun ayrı qüruru var”.
Qitə birinciliyində fəxri kürsünün ən yüksək pilləsinə qalxan Yusuf Fehmi Genç Avropa çempionatında hər iki ölkəni çox gözəl şəkildə təmsil etdiklərini vurğulayıb: “Bayraqlarımızın qürurla dalğalandırıldığını düşünürəm. Orada baş verən xoşagəlməz hadisələrə görə erməniləri qınayıram. İndi də əlimdə Azərbaycan Bayrağı var. Birlik və bərabərliyimiz daimi olsun. Belə gözəl qarşılanma mərasiminə görə minnətdarlığımı bildirirəm”.
Azərbaycan ağırlıqqaldıranı Nazilə İsmayılova isə həmkarlarının paytaxtımıza gəlməsinə görə çox sevindiyini söyləyib: “Türkiyəli idmançı Cansu Bektaş ilə yaxşı dostluğumuz var. Ondan çox razıyam. Onu çox istəyirəm. Dostluğumuz Türkiyədəki İslam Həmrəylik Oyunlarından başlayıb".
Bölmənin digər xəbərləri
