Bakı, 29 dekabr, Göyçək Mahmudlu, foto İlkin Cavanşirov, AZƏRTAC

Zaman hər birimiz üçün dəyərlidir. Günümüzün müəyyən hissəsini işdə, müəyyən hissəsini ailəmizlə keçirir, bəzən isə özümüzə lazım olan sənədlərin arxasınca getməli oluruq. 11 il bundan əvvələ qayıtsaq, bir sənədi əldə etmək üçün günlərlə vaxtın lazım olduğunu xatırlayarıq. Özü də işimizin həlli yolu bir idarə, müəssisə qarşısında növbə çəkməklə bitmirdi, bir neçə rəsmi qurumun qapısını döyməli olurduq. Buraya da süründürməçilik hallarını əlavə etsək, dəyərli olan zamanımızın bir sənəd yolunda hədər olduğunu görə bilərdik. Artıq 11 ildir ki, işimizi sözün əsl mənasında asanlaşdıran, zaman bölgümüzü tənzimləyən və şəffaf xidmət göstərən bir qurum - Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, qısacası “ASAN xidmət” fəaliyyət göstərir.

Fəaliyyətlərinin 11-ci ilində “ASAN xidmət”in vətəndaşlara necə xidmət göstərdiyini yaxından izləmək qərarına gəldik. Bunun üçün yolumuzu Bakıdakı 7 saylı “ASAN xidmət” mərkəzindən saldıq. Qapıdan içəri girəndən göstərilən səmimi münasibət buradan xoş təəssüratlarla ayrılacağımıza əmin olduq. Könüllülərin canfəşanlığı, xidmət almağa gələn vətəndaşlarla rəftarı, onlara can yandırmağı diqqətimizdən qaçmadı.

Müraciət edən hər kəsi səbirlə dinləyir, lazımi istiqamətə yönləndirir və əllərindən gələn köməyi göstərirdilər. Xidmət alıb gedən vətəndaşları isə gülərüzlə yola salırdılar.

11 ildə 9 milyona yaxın vətəndaşın işi asanlaşdırılıb

Dövlət Agentliyinin sədr müavini Ceyhun Salmanovla mərkəzin fəaliyyəti barədə həmsöhbət olduq. “ASAN xidmət”in xidmətlərin göstərilməsi sahəsində yeni yanaşmalar gətirdiyini, dövlət qulluqçusu - vətəndaş münasibətlərinin yeni yanaşma ortaya qoyduğunu deyən sədr müavini 11 ildə 9 milyona yaxın vətəndaşın işinin asanlaşdırıldığını diqqətə çatdırdı: “Təsadüfi deyil ki, bir neçə il əvvəl ölkə rəhbərinin müvafiq Fərmanına uyğun olaraq bir sıra dövlət qurumlarında “ASAN xidmət” konsepsiyasına uyğun xidmətlərin tətbiq edilməsinə başlanıldı. Bu gün “ASAN xidməti”n uğuru ondan ibarətdir ki, orta statistik vətəndaşın, hansısa şirkət rəhbərinin və ya rəhbər vəzifəli şəxsin gələrək eyni xidmət aldığının şahidi oluruq. Hər biri eyni səviyyədə xidmət alır və heç bir problemlə üzləşmir. Bu gün “ASAN xidmət”dən məmnunluq səviyyəsi 99.8 faizdir. Həmin uğurun əsas səbəbi ölkə rəhbərinin davamlı dəstəyi və “ASAN xidmət” əməkdaşlarının birgə əlaqələndirilmiş şəkildə fəaliyyətidir.

"ASAN xidmət" təcrübəsi beynəlxalq aləmdə müxtəlif dövlətlər tərəfindən tətbiq olunur. Hazırda İndoneziya, Özbəkistan, Uqanda və Əfqanıstanda həmin konsepsiya tətbiq olunur, Qırğızıstan, Tacikistan, Efiopiya və Moldovada da bu konsepsiyanın tətbiqi ilə bağlı işlər aparılır. Bir çox beynəlxalq təşkilatlar “ASAN xidmət”i ən yaxşı təcrübə kimi öz ölkələrinə tövsiyə kimi irəli sürüblər. Bu, həqiqətən də ölkəmizin bir uğurudur ki, Azərbaycanda yaradılan bir brend dünyanın müxtəlif ölkələrində Azərbaycanın adı ilə təqdim olunur və insanlara xidmət göstərilir”.

ASAN həm xidmət göstərir, həm gəncləri gələcəyə hazırlayır, həm də Vətənə, millətə təmənnasız xidməti təşviq edir

“ASAN Könüllüləri” Təşkilatının sədri Anar Musaevin sözlərinə görə, "ASAN xidmət" mərkəzlərində könüllülər iki ay müddətində könüllülük fəaliyyətinə cəlb olunurlar. Onlar mərkəzlərə müraciət edən vətəndaşların daha sürətli daha asan şəkildə xidmət almalarına dəstək göstərirlər. Öz ixtisaslarına və maraq dairələrinə uyğun olaraq "master-2" pilləsi üzrə müvafiq şöbələrdə təcrübə keçə bilirlər. ASAN könüllülərinin təşəbbüsü ilə 2012-ci ildə “ASAN Könüllüləri” Təşkilatı yaradılıb. Könüllülərin şəxsi inkişafı, onların ideyalarının reallaşması və kadr kimi formalaşmağı istiqamətində müxtəlif formatlarda, müxtəlif mövzularda təlimlər, layihələr həyata keçirilir. Bu günədək təşkilat tərəfindən 850-dən çox yerli və beynəlxalq layihələr həyata keçirilib. Eyni zamanda, könüllülərin məşğulluğu istiqamətində də “ASAN kadr” karyera mərkəzi fəaliyyət göstərir. 3 min 300-dən çox ASAN könüllüsü “ASAN xidmət” mərkəzlərində və eyni zamanda əməkdaşlıq etdiyimiz dövlət qurumlarında və özəl şirkətlərdə işlə təmin olunub.

Bu günədək 35 mindən çox gəncin yolu könüllü kimi “ASAN xidmət” mərkəzlərindən keçib

İki aya yaxındır ASAN könüllüsü kimi fəaliyyət göstərən Südabə Cəfərzadə mərkəzin daxilində 3 saatdan ibarət xidmətlərinin olduğunu, şəxsi inkişaf və ictimai fəaliyyəti inkişaf etdirmək üçün müxtəlif mövzularda olan təlim və tədbirlərə cəlb edildiklərini deyib: “Qürur duyuram ki, ASAN könüllüsüyəm və vətəndaşlara kömək göstərirəm”.

“ASAN xidmət”in həyatında böyük dəyişikliklərə səbəb olduğunu deyən "master 2" pilləsində təcrübə keçən könüllü Əsəd Hüseynov müxtəlif təlim və tədbirlərdə iştirak edərək sosiallaşdığını diqqətə çatdırıb. Onun ən böyük arzularından biri azad edilmiş ərazilərdə fəaliyyət göstərməkdir.

Vaxtilə “ASAN xidmət”də könüllü olaraq fəaliyyət göstərən Şəbnəm Novruzova hazırda Dövlət Agentliyinin İctimaiyyətlə əlaqələr şöbəsinin əməkdaşıdır.

“Könüllü olduğumuz müddətdə çox böyük dəyərlər qazanırıq. Həmin dövrdə əldə etdiyim təcrübə bu gün mənim fəaliyyətimə çox böyük dəstək oldu. Könüllülük fəaliyyətimə başladığım qurumda işləməkdən qürur duyuram”, - deyə o AZƏRTAC-ın müxbirinə bildirib.

ASAN həm də cütlüklərin xoş günlərini əbədiləşdirdiyi əsas yerlərdən biridir - Ceyhun və Tünzalə kimi

Mərkəzə baş çəkdiyimiz dövrdə çox xoş bir hadisəyə də şahidlik etdik. Sevgiləri gözlərindən oxunan iki həyəcanlı gənc - Ceyhun Rəhimzadə və Tünzalə Qasımova cütlüyü həyat yollarını məhz 7 saylı "ASAN xidmət"də birləşdirməyi qərara alıblar. Onlar özəl günlərini belə xüsusi məkanda qeyd etməkdən məmnunluq ifadə edirlər.

Vətəndaşlar ASANdan razıdırlar - 99.8 faiz məmnunluq təsadüfi deyil

Çox müsbət aura ilə ayrıldığımız “ASAN xidmət” mərkəzindən xidmət alan vətəndaşların da fikrini aldıq. Bizdən öncə isə qapıda əlində bloknot və qələmlə dayanan könüllü xidmət alıb çıxan vətəndaşlara "Hansı xidməti aldınız? Fəaliyyətimizdən razı qaldınızmı?" mərkəzin müxtəlif xidmətlərindən yararlanan vətəndaşların cavabı bir idi: "Bəli, çox razı qaldıq".

Mərkəzdə xidmət alan Ülviyyə Nəcəfli bizi görər-görməz özü yaxınlaşdı. Məmnunluqla: "Xarici pasport üçün müraciət etdim. Operativ şəkildə həll olundu. Xidmətdən çox razıyam", - deyə bildirdi.

"ASAN xidmət" işçilərinin bir neçə saatlıq fəaliyyəti ilə tanışlığımızda bir qənaətə gəldik: burada hər şey operativ və şəffaf şəkildə həyata keçirilir. Fəxr duyulası məqam odur ki, milli brendimiz nəinki ölkə daxilində, respublika hüdudlarından kənarda da insanların işini ASANlaşdırmağa xidmət edir. Peşə bayramınız mübarək, əziz ASANçılar. Özlərinin dili ilə desək, işiniz ASAN olsun!