REGİONLAR
İsmayıllıda selə qarşı qabaqlayıcı tədbirlər görülür
Bakı, 4 fevral, AZƏRTAC
Azərbaycan Dövlət Su Ehtiyatları Agentliyinin (ADSEA) tabeliyində olan İsmayıllı Su Meliorasiya Sistemlərinin İstismarı İdarəsi tədbirlər planına uyğun olaraq işlərini davam etdirir.
ADSEA-dan AZƏRTAC-a bildirilib ki, idarə tərəfindən yaşayış məntəqələrinin sel sularından mühafizəsini təşkil etmək üçün bir sıra tədbirlər həyata keçirilir. Bunun üçün dağ çaylarında məcra təmizləmə işləri və daş-beton bəndin inşası aparılır. Çayın məcrasının təmizlənməsi nəticəsində yaxınlıqda olan yaşayış məntəqələri və əkin sahələri sel sularından mühafizə ediləcək. Bu məqsədlə ötən il 350 min kubmetr çay məcrası daşqın və selə qarşı mübarizə məqsədilə təmizlənib.
8800 hektardan artıq sahəyə xidmət edən idarə İsmayıllı rayonunda növbəti suvarma mövsümü ilə əlaqədar gücləndirilmiş iş rejimində çalışır. Ötən il İsmayıllı Su Meliorasiyası Sistemlərinin İstismarı İdarəsinin balansında olan Qubaxəlilli və Kürdmaşı kəndlərində subartezian quyuları əsaslı təmir olunaraq istismara verilib. 33 ədəd nasos cari təmir olunub, 5 ədəd subartezian quyusu yeni nasoslarla əvəzlənib. Göyçay-İsmayıllı beton kanalı 2 kilometr məsafədə cari təmir olunub. Su itkisinin qarşısını almaq, suyun maneəsiz axınını təmin etmək üçün suvarma kanalları 300 min kubmetr həcmdə lildən təmizlənib.
Qeyd edək ki, İsmayıllı Su Meliorasiyası Sistemlərinin İstismarı İdarəsinin sahəsi 10590 aktiv əhali, 291 büdcə və kommersiya abonentinə xidmət göstərir. İsmayıllı şəhərinin içməli su təchizatı və kanalizasiya sisteminin başa çatdırılması nəticəsində şəhərdə əhali fasiləsiz olaraq içməli su ilə təmin edilir. 2023-cü il sentyabrın 11-də Prezidentin Sərəncamına əsasən İsmayıllı rayonunun İvanovka, Uştal, Qalagah, Soltankənd, Hacıhətəmli, Ruşan, Vəng, Mollaisaqlı və Mücühəftəran kəndlərində yaşayan 11000 nəfər əhalinin içməli su ilə təminatının yaxşılaşdırılması məqsədilə Göyçay çayından çəkilmiş magistral su kəmərinin və kəndlərin daxili su şəbəkələrinin yenidən qurulması işləri yekunlaşıb. Topçu kəndi ərazisində qazılması nəzərdə tutulan 4 subartezian quyusunun hamısı istifadəyə verilib. İstisu kəndi ərazisində İstisu çay hövzəsində yeni layihəyə uyğun olaraq işlər tamamlanıb.
Bölmənin digər xəbərləri
