İsmət Baxışov: İqlim dəyişikliklərinin monitorinqi dayanıqlı inkişaf üçün vacibdir
Bakı, 20 may, AZƏRTAC
Biz iqlim dəyişikliyinin mənfi təsirləri ilə üz-üzəyik. Artıq üç ildən çoxdur ki, “Climate Report AZ” platformasını təqdim edirik. Bu, sadəcə veb-sayt deyil, müxtəlif istiqamətlər üzrə dinamik xəritələr sistemidir. Burada su ehtiyatları ilə bağlı məlumatlarla yanaşı, kənd təsərrüfatı, meşə təsərrüfatı, suyun keyfiyyəti və digər sahələr üzrə dəyişikliklər də izlənilir. Xəzər dənizi də bu iqlim hesabatının əsas mövzularından biridir.
AZƏRTAC xəbər verir ki, bu fikirləri Azərbaycan Respublikasının Kosmik Agentliyinin Coğrafi İnformasiya Sistemləri (CİS) Mərkəzinin direktoru İsmət Baxışov WUF13 çərçivəsində təşkil olunan “İqtisadi Əməkdaşlıq və İnkişaf Təşkilatı – Şəhərləri daha yaxşı məlumatlarla gücləndirmək: siyasət və qərarqəbuletmə üçün əlçatan və tətbiq edilə bilən məlumatlar” adlı sessiyada səsləndirib.
Onun sözlərinə görə, ölkə əhalisinin böyük hissəsi sahilboyu ərazilərdə, xüsusilə Abşeron yarımadasında yaşayır. Buna görə də platforma vasitəsilə su səviyyəsinin azalması ilə bağlı proqnozlar təqdim olunur.
“Hazırda Xəzər dənizində suyun azalması prosesi müşahidə edilir. Bu platforma vasitəsilə, məsələn, su səviyyəsinin daha bir metr enəcəyi təqdirdə hansı nəticələrin yaranacağını əvvəlcədən proqnozlaşdırmaq mümkündür”, – deyə o bildirib.
Sessiyada qeyd olunub ki, yer müşahidəsi məlumatlarının əlçatanlığının artırılması və innovativ həllərin təşviqi dayanıqlı inkişaf və biomüxtəlifliyin qorunması baxımından mühüm əhəmiyyət daşıyır. Bu istiqamətdə həyata keçirilən təşəbbüslər çərçivəsində suyun keyfiyyətinin monitorinqi, ekoloji göstəricilərin izlənməsi və açıq məlumat platformalarının istifadəsi xüsusi diqqət mərkəzində saxlanılır.
Bölmənin digər xəbərləri
