İSPANİYANIN OTÜSTÜ XOKKEY ÜZRƏ YIĞMA KOMANDASININ İKİ ÜZVÜNÜN DOPİNQDƏN İSTİFADƏ ETMƏSİ TƏSDİQLƏNMİŞDİR
Bakıda qadınlar arasında keçirilmiş otüstü xokkey üzrə lisenziya xarakterli beynəlxalq turnir zamanı İspaniya yığmasının iki üzvündən götürülmüş analizin B testinin nəticələri açıqlanmışdır.
AZƏRTAC xəbər verir ki, Beynəlxalq Xokkey Federasiyasının (FİH) bununla bağlı yaydığı bəyanatda ispaniyalıların istifadəsi qadağan olunmuş dərman preparatın istifadə etməsi öz təsdiqini tapmışdır. Az öncə adları açıqlanmayan iki xokkeyçidən götürülən analizin A testi müsbət nəticə vermişdir. Laboratoriyada təkrar analiz aparılarkən ispaniyalı oyunçuların Bakıda həqiqətən dopinqdən istifadə etdikləri bir daha təsdiq edilmişdir.
FİH rəhbərliyinin İspaniyanın qadınlardan ibarət otüstü xokkey yığması ilə bağlı hansı qərarı verəcəyi hələlik məlum deyildir. Yaxın vaxtlarda hər iki idmançı FİH-in hüquq komitəsi tərəfindən dindiriləcəkdir. Yekun qərar iyunun sonlarınadək elan olunacaqdır.
Qeyd edək ki, İspaniya milli komandasının lisenziyası ləğv edildiyi təqdirdə Azərbaycanın otüstü xokkey üzrə qadınlardan ibarət yığma komandası Pekin Olimpiadasında iştirak etmək şansı əldə edəcəkdir.
Bölmənin digər xəbərləri
