İstanbulda müasir müstəmləkəçilikdən təsirlənən regionlarda humanitar diplomatiya mövzusu müzakirə edilir
İstanbul, 11 avqust, AZƏRTAC
Bu gündən İstanbulun Demokratiya və Azadlıqlar Adasında “Bosfor Diplomatiya Forumu 2026” (BDF) işə başlayıb.
AZƏRTAC xəbər verir ki, bu il “Böhranlar dövründə humanitar diplomatiya” mövzusunda Gənc Diplomatiya Dərnəyi tərəfindən keçirilən tədbir orta məktəb şagirdləri və universitet tələbələrini diplomatiya, eləcə də beynəlxalq münasibətlər sahəsində bir araya gətirmək məqsədi daşıyır.
Forumun açılış mərasimində İstanbul valisi Davut Gül, İlim Yayma Vəqfinin Müvəkkillər Heyətinin sədri Nəcməddin Bilal Ərdoğan, Türkiyə Prezident Administrasiyasının İnvestisiya Ofisinin rəhbəri Ahmet Burak Dağlıoğlu, “Türk Telekom”un baş direktoru Əbubəkir Şahin, Sıfır Tullantı Vəqfinin sədri və COP31 üzrə yüksəksəviyyəli iqlim çempionu Samed Ağırbaş, Gənc Diplomatiya Dərnəyinin sədri Selman Bilir, sədr müavini Ömər Tayyib Ərdoğan, dərnəyin İdarə Heyətinin üzvləri, protokol nümayəndələri və tələbələr iştirak ediblər.
Avqustun 16-dək keçiriləcək “BDF 2026” çərçivəsində gənclər böhranların siyasi nəticələri ilə yanaşı, onların insan həyatına birbaşa təsirlərini humanitar diplomatiya perspektivindən müzakirə edəcəklər.
Forum çərçivəsində 3-ü ingilis, 1-i türk, 1-i ərəb və 1-i fransız dillərində olmaqla, ümumilikdə 6 komitə fəaliyyət göstərəcək. Komitələr müasir müstəmləkəçilikdən təsirlənən regionları humanitar diplomatiya çərçivəsində nəzərdən keçirəcəklər.
Bölmənin digər xəbərləri
