İtaliya Azərbaycanın ən vacib ticarət tərəfdaşlarından biridir
Bakı, 29 aprel, AZƏRTAC
Aprelin 29-da xarici işlər naziri Elmar Məmmədyarov III Qlobal Bakı Forumunda iştirak etmək üçün ölkəmizdə səfərdə olan İtaliyanın keçmiş xarici işlər naziri Franko Frattini ilə görüşüb.
Xarici İşlər Nazirliyinin mətbuat xidmətindən AZƏRTAC-a verilən məlumata görə, görüşdə tərəflər Azərbaycan və İtaliya arasındakı münasibətlərin cari səviyyəsindən məmnunluq ifadə ediblər. İtaliyanın Avropa İttifaqında Azərbaycanın ən vacib ticarət tərəfdaşlarından biri olması xüsusilə qeyd edilib.
Söhbət zamanı Avropanın enerji təhlükəsizliyinin təmin olunmasında TAP və TANAP layihələrinin əhəmiyyəti vurğulanıb.
Franko Frattini ölkəmizin regiondakı əhəmiyyətli rolunu, uğurlu və tarazlaşdırılmış xarici siyasət yürütdüyünü xüsusilə qeyd edib.
Görüşdə ölkəmizdə keçirilən III Qlobal Bakı Forumunun beynəlxalq məsələlərin qeyri-rəsmi mühitdə müzakirəsi baxımından əhəmiyyəti vurğulanıb.
Franko Frattini Azərbaycanda birinci Avropa Oyunlarının ən yüksək səviyyədə keçiriləcəyinə əminliyini ifadə edib və bu Oyunların Avropada idman, sülh və tərəqqiyə töhfə verəcəyini diqqətə çatdırıb.
Bölmənin digər xəbərləri
