İtaliya yanvar ayından bəri əvvəlki iki ildə olduğundan daha çox miqrantı geri qaytarıb
Bakı, 14 avqust, AZƏRTAC
Bu ilin əvvəlindən İtaliya hakimiyyəti 5,3 min qanunsuz miqrantı geri qaytarıb ki, bu da əvvəlki iki ilin analoji dövrü ilə müqayisədə iki dəfə çoxdur.
AZƏRTAC TASS agentliyinə istinadla xəbər verir ki, bu barədə respublikanın daxili işlər naziri Matteo Piantedozi Şengen məsələləri üzrə komissiyanın dinləmələri zamanı bildirib.
“Hazırkı hökumətin siyasəti nəticəsində qanunsuz miqrantların geri qaytarılması tendensiyası artır. 2026-cı ildə 5,3 min nəfər ölkədən çıxarılıb ki, bu da 2024-cü və 2025-ci illərin eyni dövründəki göstəricidən iki dəfə çoxdur”, – deyə ANSA agentliyi nazirin sözlərindən sitat gətirir.
Bununla yanaşı, dəniz yolu ilə ölkəyə gələnlərin sayı da ardıcıl olaraq azalır. Bu il onların sayı ötən illə müqayisədə 55 faiz az olub. Nazir bildirib ki, onun rəhbərlik etdiyi qurumun məlumatına görə, 2026-cı ilin əvvəlindən İtaliyaya dəniz yolu ilə ümumilikdə təxminən 17 min miqrant gəlib. Onun sözlərinə görə, bu, iyulun sonunda İspaniyanın Şimali Afrikada yerləşən Seuta muxtar şəhərinə daxil olan qanunsuz miqrantların sayının yalnız dörddə birinə bərabərdir.
O vurğulayıb ki, qeyd olunan miqrasiya böhranı səbəbindən müvəqqəti dayandırılmış İspaniya ilə Şengen Sazişinin fəaliyyəti yalnız Avropa sərhədləri üçün bütün təhlükəsizlik təhdidləri aradan qaldırıldıqdan sonra bərpa ediləcək. Daxili işlər nazirinin sözlərinə görə, İspaniya ilə sərhəd nəzarəti tətbiq edildikdən sonra 3 nəfər həbs olunub və üçüncü ölkələrin 21 vətəndaşının ölkəyə girişinə icazə verilməyib. Onların 6-sı İspaniyanın Seuta şəhəri ilə həmsərhəd olan Mərakeş vətəndaşlarıdır.
Bölmənin digər xəbərləri
