“JEEP FESTİVAL”I İŞTİRAKÇILARI ŞƏKİDƏ YARIŞMIŞLAR
Şəki, 30 may (AZƏRTAC). Xəbər verildiyi kimi, Gənclər və İdman Nazirliyinin dəstəyi və Azərbaycan Avtomobil Dilerləri Assosiasiyasının (AADA) təşkilatçılığı ilə mayın 28-də Bakıda Respublika gününə həsr olunmuş “Jeep festival”ına start verilmişdir.
İki mərhələdən ibarət festivalın birinci mərhələsində iştirakçılar paytaxtın Azadlıq meydanından Şəkiyə yürüş etmişlər.
Mayın 29-da Şəki rayonunun Aşağı Şabalıd kəndi yaxınlığında festivalın ikinci - əsas mərhələsinin yarışları keçirilmişdir. “Trial” adlanan bu mərhələdə yüksək yerimə qabiliyyətli avtomobillər dağlarda, yolsuzluq şəraitində yarışmışlar.
Festivalın ikinci mərhələsinin rəsmi açılış mərasimində çıxış edən Şəki Şəhər Gənclər və İdman İdarəsinin rəisi Vüqar İsgəndərov və AADA-nın sədri Natiq Zərbəliyev bu yarışların gənclərin vətənpərvərlik ruhunda tərbiyə olunması, onlarda texniki idman növlərinə maraq yaratmaq, habelə ölkədə avtomobil turizminin inkişafına təkan vermək məqsədi daşıdığını bildirmiş, iştirakçılara uğurlar arzulamışlar.
Folklor və rəqs kollektivlərinin, pəhləvanların çıxışlarından sonra yarışlara start verilmişdir. Yüksək yerimə qabiliyyətli 12 avtomobil heyəti dağlarda, yolsuzluq şəraitində 8 mərhələ üzrə yarışmış, öz məharətlərini nümayiş etdirmişlər. Yekun nəticəyə görə, “Bakı Avtomobil Klubu”nu təmsil edən heyət daha uğurlu çıxış edərək yarışın qalibi adını qazanmışdır. Sonrakı yerləri “bp-Azərbaycan” və “KİA-Azərbaycan” heyətləri tutmuşlar.
Şəki Şəhər İcra Hakimiyyətinin başçısı Nazim İbrahimov və təşkilatçı qurumların təmsilçiləri qaliblərə kubok, medal və qiymətli hədiyyələr təqdim etmişlər.
Bu yarışların Şəkidə ənənəvi olaraq hər il keçirilməsi qərara alınmışdır.
Bölmənin digər xəbərləri
