Jordan Bardella: Fransa dövləti yanlış idarə edilir
Paris, 30 avqust, AZƏRTAC
Fransa Milli Birlik Partiyasının lideri Jordan Bardella ölkədəki iqtisadi və idarəetmə vəziyyətini sərt şəkildə tənqid edib. AZƏRTAC xəbər verir ki, o, mətbuatda çıxışında Fransanın potensialına baxmayaraq, dövlətin yanlış idarə olunduğunu söyləyib. “Dövlət əsas vəzifələri ilə məşğul olmalıdır və Fransa risk edən insana yenidən dəyər verməyi öyrənməlidir”, – deyə Bardella vurğulayıb. O, İkinci Dünya müharibəsindən sonra Fransanın sürətli inkişafını xatırladaraq belə davam edib: “1945-ci ildə Fransa diz çökdürülmüşdü. Amma on il sonra ölkə 30 illik iqtisadi yüksəliş dövrünə qədəm qoydu. Çünki o zaman sahibkara və işə götürənə tam etibar var idi”.
“Bu gün ölkəmizin ayağında daşlar var: çoxlu qaydalar, yüksək vergi yükləri, əməkhaqqı sistemi və çox aşağı maaşlar. Biz təklif etmişik ki, dövlət zəmanətli suveren bir fond yaradılsın və onun vasitəsilə fransızlar öz ölkələrinin səhmdarına çevrilsinlər”, - deyə Jordan Bardella bildirib.
Çıxışının sonunda Bardella metaforik və tənqidi bir ifadə ilə diqqət çəkib: “Fransa bəlkə də dünyanın ən yaxşı oyunçularına sahibdir, amma onu eşşəklər idarə edir”. Bu ifadə onun idarəçilik sahəsindəki kəskin narazılığını və dövlət rəhbərliyinə yönəlmiş tənqidini simvolizə edir. Bardella ölkənin qarşısındakı maneələrin əsas səbəbi kimi bürokratiya və dövlət siyasətindəki zəifliyi göstərir.
Partiya liderinin bu çıxışı iqtisadi islahatlar, dövlətin rolu və idarəçilik keyfiyyəti mövzusunda davam edən siyasi debatlara yeni bir ton verib.
Fransa Milli Birlik Partiyasının lideri Jordan Bardella Baş nazir Fransua Bayrunun MEDEF qarşısındakı çıxışından sonra mətbuatda mövqeyini ifadə edib və ölkədəki siyasi vəziyyəti çıxılmaz adlandıraraq, yalnız yeni seçkilərin vəziyyətdən çıxış yolu olduğunu bildirib. O, Bayrunun etimad səsverməsi qərarını sərt şəkildə tənqid edib və bunu siyasi intihar adlandırıb.
“Bayrunun maneədən qaçması, ictimai maliyyəni bərpa etmək üçün cəsarətli qərarlar almağa hazır olmadığını göstərir”, – deyə partiya lideri əlavə edib.
Bardellanın bu çıxışı Fransa siyasi arenasında hökumətin legitimliyi və gələcək iqtisadi siyasət ətrafında gedən gərgin müzakirələri daha da alovlandırıb. Partiya lideri hökumətin siyasi zəifliyini və qərarsızlığını ölkənin əsas problemlərindən biri kimi qiymətləndirib. O, 8 sentyabr etimad səsverməsinin Milli Assambleyanın buraxılması, ya da Makronun istefası ilə nəticələnəcəyini söyləyib.
Bölmənin digər xəbərləri
