JURNALİSTLƏRƏ MÜKAFATLAR TƏQDİM EDİLMİŞDİR
Prezidentin İcra Aparatının humanitar siyasət şöbəsinin müdiri Fatma Abdullazadə mərasimi açaraq vurğuladı ki, Həsən bəy Zərdabinin “Əkinçi” qəzetindən, Şərqdə ilk satirik “Molla Nəsrəddin” jurnalından qaynaqlanan müasir Azərbaycan jurnalistikası görkəmli maarifçilərimizin ənənələrini ardıcıl surətdə davam etdirir. Azərbaycan mətbuatının əsas dövrlərinə toxunan F.Abdullazadə dedi ki, şübhəsiz, Xalq Cümhuriyyəti dövründə görkəmli ictimai xadim, maarifçi və bəstəkar Üzeyir Hacıbəyovun redaktoru olduğu “Azərbaycan” qəzetinin nəşri mətbuat tarixinin ən parlaq səhifələrindən biri idi.
Milli jurnalistikamızın Ermənistan-Azərbaycan, Dağlıq Qarabağ münaqişəsinin qanlı hadisələri ilə bir vaxta düşdüyü, qaynar bölgələrdən material hazırlayan reportyorun haqq sözünün cəmiyyətdə böyük əks-səda doğurduğu postsovet dövrü gənc istedadlı jurnalistlər nəslinin təşəkkül tapmasına gətirib çıxarmışdır. Tanınmış jurnalist, Azərbaycan Prezidenti İlham Əliyevin Sərəncamı ilə ölümündən sonra “Şöhrət” ordeni ilə təltif edilmiş Nəcəf Nəcəfovun bu nəslin formalaşmasında əvəzsiz rolu olmuşdur.
Sonra jurnalistlərə “Tərəqqi” medalı, “Əməkdar jurnalist” və “Əməkdar mədəniyyət işçisi” fəxri adlarının vəsiqələri təqdim edildi.
AZƏRTAC-ın baş direktoru Aslan Aslanov mətbuatımıza diqqət və qayğıya, jurnalistlərin yüksək dövlət mükafatına və adlara layiq görülməsinə, “Azərbaycan” nəşriyyatında çıxan qəzetlərin 2001-ci il dekabrın 31-dək olan borclarının silinməsinə, milli mətbuatın yubileyinin dövlət səviyyəsində qeyd olunmasına görə Azərbaycan Prezidentinə minnətdarlığını bildirdi. O, xüsusi vurğuladı ki, təltif olunanların və fəxri adlara layiq görülənlərin əksəriyyəti mətbuatımızın böyük qayğıkeşi, dostu, müstəqil dövlətimizin memarı Heydər Əliyevin jurnalistika məktəbinin yetirmələridir.
Mətbuat Şurasının sədri Əflatun Amaşov təltif olunanlar adından dövlətimizin başçısına minnətdarlığını bildirdi.
