Kağız tullantılarının təkrar emalı prosesi ətraf mühitin çirklənməsinin qarşısını alır
Bakı, 31 yanvar (AZƏRTAC). ARDNŞ-in struktur bölmələrində formalaşan bir çox tullantılar təkrar emal və utilizasiya edilməsi məqsədi ilə çeşidlənərək Ekologiya İdarəsinin tullantı mərkəzində toplanmış, təkrar emalı mümkün olan bəzi tullantılar isə müvafiq emal müəssisələrinə verilmişdir.
AZƏRTAC xəbər verir ki, tullantı mərkəzinin ekoloji ölçmə və tullantıların idarə olunması departamentinin əməkdaşları təhvil verilmiş kağız tullantılarının təkrar emalı prosesinə baxış keçirmək üçün Sumqayıt şəhərinin H.Z.Tağıyev qəsəbəsində yerləşən “Azərbaycan Kağız və Karton İstehsalı Kombinatı” MMC-də olmuşlar.
2012-ci ildən fəaliyyətə başlamış bu kombinatın əsas istehsalat sahəsi təxminən 1,5 hektar ərazini əhatə edir. Burada kağız tullantılarının emalı üçün Rumıniya, Türkiyə və Çin istehsalı olan müasir avadanlıq quraşdırılmışdır. Hazırda gün ərzində kombinatda 40 ton kağız-karton emal olunur.
Bu proses gələcəkdə tullantıların təkrar emalı və səmərəli istifadə edilməsi, ətraf mühitin çirklənməsinin qarşısının alınması ilə yanaşı, ölkəmizin iqtisadiyyatına da müsbət təsir göstərəcəkdir.
Bölmənin digər xəbərləri
