KANÇO XİROKAZU KANAZAVA İDMANÇILAR VƏ MƏŞQÇİLƏR ÜÇÜN SEMİNAR KEÇİRMİŞDİR
Bakı, 20 may (AZƏRTAC). Bakıda Milli Olimpiya Komitəsinin və Gənclər və İdman Nazirliyinin təşkilati dəstəyi ilə şotokan karate-do üzrə 5-ci beynəlxalq attestasiyalı texniki seminar keçirilmişdir.
Seminarın yekununda Azərbaycan Milli Karate Federasiyasının dəvəti ilə ölkəmizdə səfərdə olan əfsanəvi karate ustası, 10-cu dan kəmərinin sahibi, Beynəlxalq Şotokan Karate-do Federasiyasının (SKİF) prezidenti Kanço Xirokazu Kanazavaya həsr olunmuş kadetlər və gənclər arasında “Kanazava Kuboku” keçirilmişdir.
Seminarda Azərbaycan, Rusiya, Gürcüstan, İran və Qazaxıstandan gəlmiş idmançılar və məşqçilər iştirak etmişlər. Məşqləri Xirokazu Kanazava və SKİF-in şef-təlimatçısı Manabu Murokami aparmışlar.
Seminarın gedişində karate-do-nun aşırma texnikası, nəfəs təmrinləri, döyüş duruşu nümayiş etdirilmiş, şagird (kyu) və usta (dan) dərəcələri alınması üçün imtahan keçirilmişdir.
Bölmənin digər xəbərləri
