Kapitan Orxan Həsənov: Aprel döyüşlərində düşmən silahını atıb qaçırdı
Bakı, 2 aprel, AZƏRTAC
Aprel döyüşləri sübut etdi ki, Ermənistan ordusu Azərbaycan Ordusundan dəfələrlə zəifdir. Cəmi dörd gün davam edən döyüşlər Ermənistan ordusunun “məğlubedilməzliyi” haqqında erməni cəmiyyətində yaranan mifi darmadağın etdi.
AZƏRTAC xəbər verir ki, bunu Aprel döyüşlərinin iştirakçısı, kapitan Orxan Həsənov deyib.
Aprel döyüşlərindən əvvəl yaşayış məntəqələrimizi, mülki şəxsləri tez-tez atəşə tutan düşmənin sürətli və qətiyyətli əks-həmlə əməliyyatı nəticəsində sarsıdıcı zərbələrlə geri oturdulduğunu deyən hərbçi döyüşlər barədə danışarkən bildirib: “Gecə yarı güllə səsləri eşidildi. Lakin bu dəfə düşmənin fikri fərqli idi. Bölməyə “Həyəcan” siqnalı verildi. Tanklarımızı, döyüş maşınlarımızı bir anda işə saldıq, heyətin bütün üzvləri yüksək peşəkarlıqla öz yerlərini aldılar. Əks-hücuma keçdik. Həmin an bütün hərbçilərimizin üzündə yalnız sevinc hissi vardı. Hamı bir nəfər kimi döyüşlərə ruh yüksəkliyi ilə qatıldı. Sanki şəxsi heyət bu günü çoxdan gözləyirmiş kimi düşmən üzərinə şığıdı. Düşmənin məkrli niyyətini ürəyində boğaraq murdar ayaqları ilə bir addım belə atmağa imkan vermədik. Tanklarımızla bütün maneələri darmadağın edərək Talış yüksəkliyinə kimi irəlilədik. Düşmənin planı pozulmuşdu. Cəld və qətiyyətli cavab zərbəsi ilə qarşılaşdıqlarından özünü itirərək geri çəkilən düşməni sadəcə silah və texnikalarımız deyil, hərbçilərimizin cəsarəti, qəhrəmanlığı, Vətən, torpaq sevgisi qorxuya salmışdı. Bu döyüşlərdə rütbəsindən, vəzifəsindən asılı olmayaraq, hər kəs qəhrəmancasına döyüşərək düşməni məhv etdi və geri oturtdu. Qorxubilməz, cəsur oğullarımızın gücü qarşısında acizləşən düşmən nəinki silah və texnikasını, hətta əsgər yoldaşlarının meyitlərini belə qoyub qaçmağa başladı. Bu döyüşlər sübut etdi ki, Ermənistan ordusu da, əsgəri də Azərbaycan Ordusundan və əsgərindən dəfələrlə zəifdir. Biz bunu bütün dünyaya sübut etdik. Göstərdik ki, düşmən əzəli və əbədi torpaqlarımızdan xoşluqla çıxmasa, Ali Baş Komandanımızın əmri ilə onları məhv etməyə hər an qadirik”.
Kapitan xüsusi vurğulayıb ki, Ordumuzun Aprel zəfərindən sonra Azərbaycan Respublikasının Prezidenti, Ali Baş Komandan İlham Əliyevin dediyi “Aprel döyüşləri bizim şanlı qələbəmizdir. Azərbaycan Ordusu öz gücünü göstərdi. Ermənistan uzun illər öz ordusu haqqında yalanlar, miflər uydururdu. Guya onların yenilməz ordusu var. Aprel döyüşləri göstərdi ki, hansı ordu yenilməzdir. Azərbaycan Ordusu yenilməz ordudur. Azərbaycan Ordusu istənilən vəzifəni icra etməyə qadirdir” sözləri şəxsi heyətin bu qələbəsinə verilən layiqli qiymət olmaqla yanaşı, hərbçilərimizi daha böyük qələbələrə də ruhlandırır.
Naxçıvan şəhərində anadan olduğunu deyən döyüşçü bildirib: “Əsrlərdir xalqımıza zülm edib taleyinə soyqırımı, faciə, qaçqın və məcburi köçkün həyatı yazan düşmənlərimizdən qisas almaq hissi ilə böyüdüm. Elə həmin illərdən qəlbimdə bir arzu anbaan böyüyürdü: Azərbaycanımızın işğaldan azad olunmuş bütün torpaqlarında üçrəngli bayrağımızın dalğalanmasını görmək. Bu arzu ilə Vətəni qorumaq peşəsini - hərbçi olmağı seçdim. 2003-2006-cı illərdə Heydər Əliyev adına Hərbi Liseydə təhsil aldıqdan sonra Heydər Əliyev adına Azərbaycan Ali Hərbi Məktəbini bitirərək leytenant rütbəsi ilə ön xətdə xidmətə başladım. Goranboy, Tərtər, Ağdam istiqamətlərində düşmənlə təmas xəttində qulluq edərkən ön cəbhədə xidmət aparan hərbçilərin dövlətimizə, ordumuza bağlılığının, vətənpərvərliyinin şahidi olduqdan sonra hərbçi peşəsinə sevgim və həvəsim daha da artdı”.
Bölmənin digər xəbərləri
