Katmandu aeroportu fəaliyyətini bərpa edib
Bakı, 11 sentyabr, AZƏRTAC
Nepalda baş verən iğtişaşlar səbəbindən fəaliyyəti müvəqqəti dayandırılan Katmandu Beynəlxalq Hava Limanı daxili və beynəlxalq uçuşların qəbulunu bərpa edib.
AZƏRTAC xəbər verir ki, hava limanının baş meneceri Xanşarac Pandey bu barədə jurnalistlərə açıqlamasında deyib.
Onun sözlərinə görə, artıq həm ölkədaxili, həm də beynəlxalq reyslər tam bərpa olunub.
Xatırladaq ki, hava limanı ölkədə korrupsiyaya qarşı narazılıqlar və sosial şəbəkələrin qadağan olunması ilə bağlı son günlər baş verən kütləvi etirazlar və sabitliyin pozulması fonunda fəaliyyətini dayandırmışdı. Ölkənin müxtəlif şəhərlərində aksiya iştirakçıları ilə polis arasında toqquşmalar baş verib, dövlət qurumlarının, o cümlədən Parlamentin, Ali məhkəmənin və Baş prokurorluğun binaları yandırılıb.
Nepal Səhiyyə Nazirliyinin məlumatına görə, toqquşmalar zamanı 30-dan çox insan həlak olub, mindən çox insan isə yaralanıb. Ölkədə komendant saatı tətbiq olunub.
Sentyabrın 9-da hökumət sosial şəbəkələrin fəaliyyətinə qoyulan qadağanı ləğv edib. Sentyabrın 10-da isə Nepal ordusu ölkənin böhrandan çıxarılması məqsədilə etirazçılarla danışıqlara hazır olduğunu bildirib. Kütləvi etirazlar, həmçinin Baş nazir Şarma Olinin istefası ilə nəticələnib.
Bölmənin digər xəbərləri
