“KƏMALƏT” HƏRƏKATININ NÜMAYƏNDƏ HEYƏTİ NARKOMANİYA İLƏ MÜBARİZƏ SAHƏSİNDƏ AZƏRBAYCANIN TƏCRÜBƏSİNİ ÖYRƏNƏCƏKDİR

20.12.2005 [15:36]
Çap et
A⁺ A^-

Özbəkistanın “Kəmalət” gənclər hərəkatının nümayəndə heyəti Azərbaycana gəlmişdir. Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, səfərdən başlıca məqsəd narkomaniya ilə mübarizə və qanun pozuntularının profilaktikası sahəsində Azərbaycanın təcrübəsini öyrənməkdir. Səfər zamanı nazirlikdə bu mövzuda “dəyirmi masa” təşkil olunacaq, Milli Gənclər Təşkilatları Şurasının rəhbərliyi, Narkotiklərlə və Narkotik Vasitələrin Qanunsuz Dövriyyəsi ilə Mübarizə üzrə Dövlət Komissiyasının işçi qrupu ilə, habelə Daxili İşlər Nazirliyində, Respublika narkoloji dispanserində və narkomaniya ilə mübarizə məsələləri ilə məşğul olan digər qurumlarda görüşlər keçiriləcəkdir.

Özbəkistan nümayəndə heyəti dekabrın 20-də Fəxri xiyabanı və Şəhidlər xiyabanını ziyarət edərək, ümummilli liderimiz Heydər Əliyevin, Azərbaycanın suverenliyi və ərazi bütövlüyü uğrunda canlarından keçmiş şəhidlərin xatirəsini anmışlar.

Xatırladaq ki, Gənclər, İdman və Turizm Nazirliyi ilə “Kəmalət” hərəkatı arasında əməkdaşlığın əsası Prezident Heydər Əliyevin 1997-ci ildə Özbəkistana rəsmi səfəri zamanı qoyulmuş, “Azərbaycan və Özbəkistan hökumətləri arasında idman və gənclər siyasəti sahəsində əməkdaşlıq haqqında Saziş” bağlanmışdır. 2004-cü ildə nazirlik ilə “Kəmalət” hərəkatı arasında əməkdaşlığa dair tədbirlər Planı imzalanmışdır. Elə həmin il Özbəkistanda Azərbaycan gəncləri günləri, bu il isə Azərbaycanda Özbəkistan gəncləri günləri keçirilmişdir.

“KƏMALƏT” HƏRƏKATININ NÜMAYƏNDƏ HEYƏTİ NARKOMANİYA İLƏ MÜBARİZƏ SAHƏSİNDƏ AZƏRBAYCANIN TƏCRÜBƏSİNİ ÖYRƏNƏCƏKDİR

MÜƏLLİFLƏ ƏLAQƏ

Bölmənin digər xəbərləri