Kərkükdə “Vətən müharibəsi tarixi. Şəxsiyyət faktoru” kitabının təqdimatı olub
Bakı, 16 iyun AZƏRTAC
Kərkükdə “Vətən müharibəsi tarixi. Şəxsiyyət faktoru” kitabının təqdimatı keçirilib.
AZƏRTAC xəbər verir ki, Azərbaycanın İraqdakı səfirliyinin təşkilatçılığı ilə İraqın Kərkük şəhərində baş tutan tədbirdə, İraq Parlamentinin nümayəndələri, Kərkük Universitetinin professor-müəllim heyəti, yerli araşdırma mərkəzlərinin rəhbərləri və tədqiqatçıları, siyasi xadimlər, ziyalılar və media mənsubları iştirak edib.
Vətən müharibəsində həlak olan şəhidlərimizin əziz xatirəsi bir dəqiqəlik sükutla yad olunub.
Tədbiri giriş nitqi ilə açan İraq Parlamentinin İnsan Hüquqları Komitəsinin sədri Erşat Salihi İkinci Qarabağ müharibəsində əldə olunmuş qələbənin tək Azərbaycanın deyil, bütün Türk dünyasının şanlı qələbəsi olduğunu qeyd edib. Komitə sədri Qarabağın İraq türkmənləri üçün əziz və doğma diyar olduğunu, Azərbaycanda yaşanan sevincin İraq türkmənlərinin və xüsusən də Kərkük şəhərində də yaşandığını ifadə edərək, yaxın gələcəkdə İraq türkmənlərinin də yeni istifadəyə verilmiş Füzuli Beynəlxalq Hava Limanına səyahət etməsini və oradan Şuşa şəhərinə səfər etmək arzusunda olduğunu bildirib.
Ölkəmizin İraqdakı müvəqqəti işlər vəkili Nəsir Məmmədov çıxış edərək, kitabda Birinci Qarabağ müharibəsindəki məğlubiyyət, onun səbəbləri, İkinci Qarabağ müharibəsində Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusunun qazandığı qalibiyyətin əldə olunması, Ulu Öndər Heydər Əliyevin Qarabağ probleminin həlli istiqamətində qurduğu strategiya və Ordu quruculuğu sahəsində aparılmış islahatlardan danışıb.
Qeyd olunub ki, dövlət başçısı İlham Əliyevin uzaqgörən siyasəti və diplomatik qabiliyyəti, xalqı ətrafında birləşdirməsi qələbənin əldə olunmasını şərtləndirdi.
Diplomat kitabın Azərbaycan, türk, ingilis və rus dillərində nəşr edildiyini, yaxın zamanda İraqın paytaxtı Bağdad şəhərində ərəb dilində təqdimatının keçirilməsinin nəzərdə tutulduğunu qeyd edib.
Daha sonra “Zirvə” Araşdırmalar Mərkəzinin rəhbəri, professor Hüseyn Əli Əkbər bu kitabın araşdırma mərkəzi üçün faydalı olacağını, gələcəkdə tədqiqatların aparılmasında mənbə kimi istifadə ediləcəyini bildirdi. Nəzərə çatdırdı ki, İraqın ali təhsil ocaqları və araşdırma mərkəzlərinə kitabın ərəb dilində təqdim olunması vacibdir.
Universitetinin professoru Nəbil Kifirli kitabın, tələbələrin elmi işində istifadəsi üçün faydalı mənbə olduğunu, universitetin kitabxanasında təqdim olunmasının vacibliyini ifadə edərək, Azərbaycan tarixinin şanlı qələbəsinin gələcək nəsillərin elmi işlərində və tədqiqatlarında istifadə olunacağını qeyd edib.
Tədbirdə keçmiş deputat Əhmed Heydər, siyasi xadim Ammar Kəhya, tarixçi Nejdət Kövsər, ədəbiyyatçı Əli Yurdokul və digər tanınmış şəxslər çıxış edərək, Azərbaycan Prezidenti İlham Əliyevin uzaqgörən siyasəti nəticəsində əldə edilmiş qələbənin vacibliyini, işğaldan azad edilmiş ərazilərdə yenidənqurma və quruculuq işlərinin aparılması və dünya siyasətində müasir Azərbaycanın rolu barədə danışdılar.
Bölmənin digər xəbərləri
