Kim Hyonq-cin: Azərbaycanın qısa müddətdə nail olduğu iqtisadi inkişaf “Bakı möcüzəsi”dir VİDEO
Seul, 25 may, AZƏRTAC
Azərbaycanın Respublikasının Koreya Respublikasındakı səfirliyi 28 May - Respublika Günü münasibətilə paytaxt Seulda rəsmi qəbul təşkil edib.
Tədbirdə Koreyanın dövlət və hökumət rəsmiləri, parlament üzvləri, özəl sektor, ali təhsil ocaqları və tədqiqat mərkəzlərinin təmsilçiləri, diplomatlar, ictimaiyyət nümayəndələri, bu ölkədə yaşayan və təhsil alan azərbaycanlılar iştirak ediblər.
Səfir Rəmzi Teymurov Respublika Gününün əhəmiyyətindən söz açaraq, Azərbaycan Xalq Cümhuriyyətinin tarixi və həmin dövrdə əldə olunan nailiyyətlər barədə məlumat verib.
Müasir Azərbaycan dövlətinin ümummilli lider Heydər Əliyev və Prezident İlham Əliyevin rəhbərliyi altında əldə etdiyi uğurlu inkişaf yolu barədə danışan R.Teymurov, həmçinin ölkəmizin müstəqillik dövründə üzləşdiyi ən böyük çətinlik olan Ermənistanın Azərbaycana qarşı təcavüzü və münaqişə ilə bağlı hazırkı vəziyyət barədə məlumat verib, cari ilin aprel ayında Ermənistan tərəfindən törədilmiş silahlı təxribat və bu təxribatın nəticələri haqqında danışıb.
Səfir Azərbaycan ilə Koreya arasındakı siyasi, iqtisadi, mədəni və digər sahələrdə münasibətlərdən söz açıb, nəqliyyat, informasiya və telekommunikasiya, alternativ enerji, ətraf mühit və tikinti sektorlarında mövcud olan fəal əməkdaşlığı qeyd edib.
R.Teymurov ikitərəfli münasibətlərin daha da genişləndirilməsi istiqamətində Azərbaycanın sənaye, əczaçılıq, kənd təsərrüfatı, informasiya texnologiyaları, kimya sənayesi və turizm kimi sektorlarına Koreya sərmayələrinin cəlb edilməsinin önəminə diqqət çəkib. Səfir siyasi və iqtisadi dialoqun genişləndirilməsi çərçivəsində hər iki ölkə rəhbərliyi və digər səviyyələrdə baş tutmuş qarşılıqlı səfərlərin töhfələrini vurğulayıb, dostluq münasibətlərinə əsaslanan əməkdaşlığın bütün sahələr üzrə daha da inkişaf etdiriləcəyinə inamını ifadə edib.
Koreya Respublikası xarici işlər nazirinin müavini Kim Hyonq-cin Azərbaycan xalqını Koreya hökuməti adından təbrik edib. O, Azərbaycanı təkcə Asiya və Avropa ölkələri arasında körpü və Xəzər regionunun logistik mərkəzi kimi deyil, həm də öz sürətli iqtisadi inkişafına malik və islahat yönümlü rəhbərlik altında regionun sənaye gücü olmaq istiqamətində inamla irəliləyən ölkə kimi qiymətləndirib. Nazir müavini, həmçinin Azərbaycanın qısa müddətdə nail olduğu iqtisadi inkişafı “Bakı möcüzəsi” adlandırıb.
Kim Hyonq-cin Koreya-Azərbaycan münasibətləri haqqında danışaraq iqtisadi, mədəni, təhsil, tikinti və digər sahələrdə qarşılıqlı faydalı tərəfdaşlıq əlaqələri üçün potensialın olduğunu qeyd edib, Azərbaycanın zəngin təbii ehtiyatları ilə Koreyanın insan resursları və qabaqcıl texnologiyasının birlikdə ikitərəfli münasibətlərin inkişafına təkan verə biləcəyini bildirib. O, iqtisadi əməkdaşlıq üzrə hökumətlərarası birgə komissiyanın növbəti ay keçiriləcək görüşünün əməkdaşlığın genişləndirilməsinə xidmət edəcəyini bildirib, Koreyanın Azərbaycan üçün optimal tərəfdaş olacağına əminliyini ifadə edib.
Koreya Milli Assambleyasının üzvü xanım Park İn-suk da Respublika Günü münasibətilə Azərbaycan xalqını təbrik edib.
Tədbir ziyafətlə başa çatıb.
Şahin Cəfərov
AZƏRTAC-ın xüsusi müxbiri
Seul
Bölmənin digər xəbərləri
