Kiyevdə Ukraynanın Azərbaycan diasporunun I forumu keçirilir
Kiyev, 18 may (AZƏRTAC). Bu gün mayın 18-də Ukrayna paytaxtının “Prezident oteli”nin Azərbaycan və Ukraynanın dövlət bayraqları ilə bəzədilmiş “Avropa zalı”nda “Ukraynadakı Azərbaycan diasporunun inkişaf perspektivləri” I Ümumukrayna forumu işə başlamışdır. Forumun təşkilatçısı “Ukrayna Azərbaycanlılarının Birləşmiş Diasporu” (UABD) Ümumukrayna İctimai Təşkilatıdır (ÜİT).
Tədbirin tərəfdaşları Ukrayna Azərbaycanlıları Konqresi ÜİT, “Demokratiyanın nəbzi” Beynəlxalq İctimai Təşkilatı, M.Maqomayev adına Azərbaycan Mədəniyyət Mərkəzi, Ukrayna və Azərbaycan Ziyalıları Assambleyasıdır.
Əvvəlcə iki dost ölkənin dövlət himnləri səsləndirilmişdir. Forumu giriş sözü ilə “Ukrayna Azərbaycanlılarının Birləşmiş Diasporu” ÜİT-in sədri Hikmət Cavadov açmışdır. Sonra Azərbaycanın Ukraynadakı səfiri Eynulla Mədətli çıxış etmişdir. Diplomat qeyd etmişdir ki, ulu öndər Heydər Əliyev Azərbaycanın hüdudlarından kənarda, o cümlədən Ukraynada millətin sıx birləşməsinə, dünyanın müxtəlif ölkələrində diaspor təşkilatlarının sağlam, monolit qüvvəyə çevrilməsinə xüsusi diqqət yetirirdi. Səfir vurğulamışdır ki, Prezident İlham Əliyev Ümummilli Liderin bu siyasətini uğurla, sistemli və ardıcıl şəkildə davam etdirir.
Kiyevdəki diplomatik nümayəndəliyimizin başçısı öz çıxışında “Ukrayna Azərbaycanlılarının Birləşmiş Diasporu” ÜİT-in gənc, perspektivli, yaxşı təşkilatçılıq bacarığı olan sədri Hikmət Cavadovun fəaliyyətini müsbət qiymətləndirmiş, həmvətənlərimizin ona etibar etdiklərini bildirmiş və aktiv fəaliyyətinə, vətənpərvərliyinə görə ona minnətdarlığını bildirmişdir.
Sonra səfirin toxunduğu mövzunu Azərbaycan Milli Məclisinin deputatı, Milli Məclisin “Azərbaycan-Ukrayna” Dostluq qrupunun üzvü Rüfət Quliyev, ölkəmizin Kiyevdəki keçmiş səfiri Tələt Əliyev, Rusiyanın Azərbaycanlı Gənclər Təşkilatı (RAGT) idarə heyətinin üzvü Emin Hacıyev, torakal təbabət üzrə professor Məmməd Bağırov, Hikmət Cavadov, Ukraynanın görkəmli hüquq müdafiəçisi həmvətənimiz Eduard Bağırov, Kiyev Milli Aviasiya Universitetinin professoru Arif Quliyev və başqaları davam etdirmişlər.
“Dəyirmi masa”nın birinci hissəsində azərbaycanlı elm və mədəniyyət xadimləri, özəl biznesin nümayəndələri Ukraynada Azərbaycan diasporunun həyatına dair aktual məsələləri müzakirə etmişlər. Yeri gəlmişkən qeyd edək ki, bugünkü tədbirdə beş elmlər doktoru və 12 elmlər namizədi iştirak etmişdir.
Tədbirin ikinci hissəsi gənclərə həsr olunmuşdur. “Ukrayna Azərbaycanlılarının Birləşmiş Diasporunun Gəncləri” (UABDG) regional təşkilatlarının rəhbərləri, Ukraynanın ali məktəblərində təhsil alan azərbaycanlı tələbələr, Ukraynanın azərbaycanlı gənclər təşkilatları və başqaları diaspor quruculuğu işində gənc nəslin fəallaşdırılması, Azərbaycan haqqında, Ermənistan-Azərbaycan, Dağlıq Qarabağ münaqişəsi haqqında həqiqətin dünya ictimaiyyətinə çatdırılması və s. məsələləri müzakirə etmişlər.
Forum Azərbaycan xalqının ümummilli lideri Heydər Əliyevin anadan olmasının 90 illiyinə həsr edilmiş tədbirlər çərçivəsində keçirilir.
Forumda Azərbaycan səfirliyinin əməkdaşları, iki dost ölkənin tanınmış ictimai-siyasi xadimləri, diasporumuzun üzvləri və başqaları iştirak edirlər.
Zaldakı masaların üstündə ulu öndər Heydər Əliyevdən, Prezident İlham Əliyevdən bəhs edən çap məhsulları, RAGT-ın jurnalının yeni nüsxələri, “Qolos Azerbaydjana” qəzetinin ümummilli lider Heydər Əliyevin anadan olmasının 90 illiyinə həsr edilmiş xüsusi buraxılışı və s. olmuşdur.
Forum işini davam etdirir.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
