KİYEVİN MƏRKƏZİNDƏ BAŞ VERMİŞ NƏQLİYYAT HADİSƏSİNƏ SİYASİ DON GEYİNDİRMƏK OLMAZ
“Batkivşina” hərəkatı məhkəmə araşdırmalarının nəticələrini gözləmədən, yanvarın 20-də Kiyevin mərkəzində baş vermiş nəqliyyat hadisəsi zamanı zərər çəkmiş Azərbaycan vətəndaşı Akif Müseyibova vurulmuş maddi və mənəvi zərəri, habelə onun müalicəsi üçün xərcləri ödəyəcəkdir. Həmin gün Ukrayna baş nazirinin keçmiş müavini, “Batkivşina” seçki blokunun lideri Yuliya Timoşenkonun zirehli “Mersedes”i Azərbaycan vətəndaşının idarə etdiyi “VAZ-21011” avtomaşını ilə toqquşmuşdu. Bunu Ukrayna Ali Radasında “Batkivşina” fraksiyasının lideri, parlament komitəsinin başçısı, xalq deputatı Aleksandr Turçinov Azərbaycanın Ukraynadakı səfiri Tələt Əliyevlə özünün xahişi ilə keçirilmiş görüşdə bildirmiş, eyni zamanda istintaqın gedişi barədə məlumat vermişdir.
AZƏRTAC-ın Ukraynadakı ştatdankənar müxbiri Zeynal Ağazadə bildirmişdir ki, parlament seçkiləri ərəfəsində baş vermiş bu hadisədən Azərbaycan-Ukrayna münasibətlərinə xələl gətirə biləcək siyasi qalmaqal kimi istifadə edilməsinə yol verməmək məqsədi ilə səfir Tələt Əliyev və zərərçəkən Akif Müseyibov ölkə ictimaiyyətini bu barədə ətraflı məlumatlandırmaq üçün Ukrayna milli televiziyasının birinci kanalına müsahibə vermişlər.
Bölmənin digər xəbərləri
