KOMİTƏ İŞĞAL OLUNMUŞ AZƏRBAYCAN ƏRAZİLƏRİNDƏKİ YANĞINLARA XÜSUSİ DİQQƏT GÖSTƏRƏCƏKDİR
Toplantıda komitənin üzvü Milli Məclisin deputatı Rafael Hüseynov çıxış edərək demişdir ki, komitənin iyunun 9-da Parisdə keçirilmiş yığıncağında mən ermənilərin işğal altında olan Ağdam rayonunun bir sıra kəndlərində törətdikləri yanğınlar barədə məlumat vermiş, Avropa Şurasını bu yanğınların qarşısının alınması üçün qəti addımlar atmağa çağırmışdım. O zaman komitənin rəhbərliyi və üzvləri bu problemin çox narahatlıq doğurduğunu söyləmiş və məsələnin həlli ilə əlaqədar qəti addımlar atılması zəruriyyətini vurğulamışdılar.
Lakin komitənin ötən yığıncağından 20 gün keçmişdir. Bu müddətdə yanğınlara nəinki ara verilmiş, əksinə onların miqyası daha da getdikcə genişlənmişdir. Bu gün meşə yanğınları yalnız Ağdam rayonunun kəndlərini deyil, işğal altında olan Füzuli, Cəbrayıl, Xocavənd rayonlarının, eləcə də Tərtərin bir sıra kəndlərini əhatə etməkdədir. Yanğınların əks-sədası, ətraf mühitə vurduğu zərər işğal altından kənarda olan ərazilərə də təsir etməkdədir.
İşğal altında olan ərazilərdə baş vermiş bu yanğınlar nəticəsində, yalnız təbii sərvətlərə deyil, həm də maddi mədəniyyət nümunələrinə çox ciddi ziyan dəymişdir. Məsələn, Xocavənd rayonunun ərazisində orta əsrlərdən bu günümüzə gəlib çatmış tarixi mənbə - Afşar qəbiristanlığı məhv olmaq təhlükəsi ilə üzləşmişdir.
Bu rayonun ərazisindəki digər daha bir qədim mədəniyyət məskəni, Nərgiz təpəsi də çox böyük zərərə məruz qalmışdır. Həmin yerdəki maddi mədəniyyət nümunələrinin yaşı bizim eranın əvvəllərinə aiddir. Faktik olaraq bu, yalnız Azərbaycanın deyil, Avropanın, bəşəriyyətin sərvəti deməkdir və ermənilər bu yanğınları törətməklə, yalnız ölkəmizə deyil, bəşəriyyətin mədəni irsinə ziyan vurmuşlar.
Biz bu məsələni elə bu sessiya çərçivəsində də, mətbuat səhifəsində də ermənilər qarşısında qaldırarkən, əvvəl onlar belə cavab verirdilər ki, heç bir yanğın baş verməmişdir. Lakin biz həm sərhəd zonasından, həm də peyk vasitəsilə kosmosdan çəkilmiş fotoları təqdim etdikdən sonra, ermənilər digər bəhanəyə əl atdılar və bildirdilər ki, yanğınları guya azərbaycanlıların özləri törətmişlər. Bu da əsassızdır. Çünki həmin ərazilər işğal altında olan torpaqlardır və orada azərbaycanlılar yoxdur ki, həmin yanğınları törədə bilsinlər. Bu versiya da ortadan çıxdıqdan sonra, ermənilər digər bir bəhanəyə əl atdılar ki, guya azərbaycanlıların açdıqları top atəşləri həmin yanğınlara səbəb olmuşdur. Bu bəhanə də təkzib olunmaz faktla rədd edildi. Çünki yanğınlar 132 kvadrat kilometrdən artıq ərazini əhatə edir və 100 hektarlarla ərazidə baş verən yanğınları törədə biləcək heç bir silah mövcud deyildir.
Ona görə də biz bu məsələlərlə əlaqədar AŞPA-nın sədri ilə görüşümüzdə də söhbət açmışıq, komitə sədrinə də bu barədə məlumat vermişik və bütün zəruri sənədləri Avropa Şurasının rəhbərliyinə çatdırmışıq.
Deputatımızın çıxışından sonra komitə sədri bu problemin həddindən artıq narahatlıq doğuran bir məsələ olduğunu vurğulamış və komitənin əslində ətraf mühit problemləri ilə məşğul olduğunu, lakin indi qaldırılan məsələnin yalnız ekologiya problemi deyil, həm də siyasi məsələ olduğunu söyləmişdir.
Ona görə də, məsələnin həlli ilə bağlı digər komitələrin, Avropa Şurası rəhbərliyinin də səylərini artırmağın vacibliyini bildirən komitə sədri, problemlə əlaqədar erməni tərəfi ilə danışıqlar aparacağını vurğulamış, yanğınlarla bağlı daha yeni materialları ona çatdırmağı xahiş etmişdir.
Komitə sədri bu məsələ ilə bağlı ayrıca sənəd hazırlanmasının vacibliyini xüsusi olaraq vurğulamışdır.
Bölmənin digər xəbərləri
