Könül Nurullayeva: Azərbaycan Şanxay Əməkdaşlıq Təşkilatında da söz və nüfuz sahibidir
Bakı, 17 sentyabr, AZƏRTAC
Azərbaycan təmsil olunduğu bütün regional və beynəlxalq təşkilatlarda yüksək nüfuza malikdir. Şanxay Əməkdaşlıq Təşkilatında (ŞƏT) dialoq tərəfdaşı qismində iştirak edən Azərbaycan bu platformada da vacib söz sahibi və əhəmiyyətli partnyor hesab olunur. Azərbaycan Prezidenti İlham Əliyev təşkilatın Səmərqənddə keçirilən zirvə görüşündə vacib mesajlar verərək, ölkəmizin yeni siyasi və iqtisadi düzəndə mövqeyini bəyan etdi.
Bu fikirləri AZƏRTAC-a açıqlamasında Milli Məclisin deputatı Könül Nurullayeva söyləyib.
O qeyd edib ki, ŞƏT-ə üzv ölkələrin dövlət başçılarının sammitinin yekunu olaraq qəbul edilən Səmərqənd Bəyannaməsində də regional sabitliyin, təhlükəsizliyin və davamlı iqtisadi inkişafın təmin edilməsi, nəqliyyat əlaqələrinin gücləndirilməsi, eləcə də mədəni dialoqun dərinləşdirilməsinə dair birgə yanaşmalar əksini tapıb. Bu kontekstdə Azərbaycan dialoq tərəfdaşı olaraq təşkilatın fəaliyyətinə töhfələr verir.
K.Nurullayevanın sözlərinə görə, qurum çərçivəsində əməkdaşlığın dərinləşməsi rəsmi Bakının da maraqlarına uyğundur. Xüsusilə, İkinci Qarabağ müharibəsindən sonra yaranmış yeni reallıqlar əməkdaşlıq üçün yeni imkanlar açır. Belə ki, Zəngəzur dəhlizinin açılması böyük perspektivlər vəd edir.
“Səmərqənd sammitində çıxışı zamanı dövlətimizin başçısının da söylədiyi kimi, Zəngəzur dəhlizinin açılması region ölkələrinin nəqliyyat imkanlarını daha da artıracaq və bu marşrut üzərində yerləşən bütün ölkələr üçün faydalı olacaq. İmkanları real işə çevirmək üçün isə təbii ki, regionda dayanıqlı sülh və təhlükəsizlik mühiti yaranmalıdır. Bu mənada erməni təxribatlarına son qoyulmalı, Azərbaycanın təqdim etdiyi ölkələrin bir-birinin suverenliyinin və ərazi bütövlüyünün qarşılıqlı tanınmasına əsaslanan sülh müqaviləsi üçün beş əsas prinsipin praktik müstəvidə də əksini tapmasına nail olmaq vaxtıdır. “İndi biz ilkin şərtlər və süni ləngimələr olmadan sülh sazişi layihəsi üzərində işə başlamalıyıq”, - deyən Prezident İlham Əliyev Ermənistanın Azərbaycanla dövlət sərhədində törətdiyi genişmiqyaslı hərbi təxribatların normallaşdırma prosesinə böyük bir zərbə vurduğunu bir daha bəyan etdi. Dövlətimizin başçısı buna görə bütün məsuliyyətin Ermənistanın hərbi-siyasi rəhbərliyinin üzərinə düşdüyünü tədbir iştirakçılarının diqqətinə çatdırdı”, - deyə K.Nurullayeva qeyd edib.
Deputat vurğulayıb ki, sammit çərçivəsində keçirilən ikitərəfli görüşlərdə də Azərbaycanın ərazi bütövlüyünə dəstək ifadə olundu, erməni təxribatları isə qınandı. Bir daha bəyan olundu ki, Azərbaycan İkinci Qarabağ müharibəsindən sonra Rusiya, Azərbaycan və Ermənistan arasında imzalanmış üçtərəfli sənədlərə sadiqdir. Rəsmi Bakı Qafqazda vəziyyətin sabit olması üçün əlindən gələni bundan sonra da edəcək.
“Görünən budur ki, ŞƏT çərçivəsində əməkdaşlığın yeni mərhələsi başlayır və bu mərhələdə Azərbaycan əsas tərəfdaşlardan biri kimi iştirak edir”, - deyə Könül Nurullayeva fikirlərini yekunlaşdırıb.
Bölmənin digər xəbərləri
