KÜRDƏMİR RAYONU SOSİAL-İQTİSADİ İNKİŞAF YOLUNDADIR
Yığıncaqda Kürdəmir Rayon İcra Hakimiyyətinin başçısı Fəxrəddin Məlikovun “2005-ci il rayonun sosial-iqtisadi inkişafının yekunları, 2006-cı ildə qarşıda duran vəzifələr barədə” məruzəsi dinlənilmiş, müzakirələr olmuşdur. Göstərilmişdir ki, ümummilli liderimiz Heydər Əliyevin memarı olduğu müstəqil Azərbaycan onun siyasi kursunun layiqli davamçısı Prezident İlham Əliyevin rəhbərliyi altında sürətlə inkişaf edir. Bu yüksəliş respublikamızın bölgələrində, o cümlədən Kürdəmirdə sosial-iqtisadi həyatın bütün sahələrində özünü göstərir. Keçən il oktyabrın 6-da ölkə Prezidentinin Kürdəmirə gəlişi, insanlarla görüşü, tapşırıq və tövsiyələri bölgədə əhalini daha böyük nailiyyətlər qazanmağa, tikinti, quruculuq və abadlıq işlərini genişləndirməyə ruhlandırmışdır. Ölkə başçısının bir sıra rayonların, o cümlədən Kürdəmirin sosial-iqtisadi inkişafının sürətləndirilməsinə dair əlavə tədbirlər haqqındakı 2005-ci il 14 oktyabr tarixli Sərəncamından sonra yeni süd emalı zavodunun, “Biyan” istehsal və emal müəssisəsinin, Kürdəmir-Külüllü II su kəmərinin tikintisi, 50 yerlik mehmanxananın inşası, şəhərdə kanalizasiya sisteminin yenidən qurulması istiqamətində ciddi işlər görülmüşdür.
Regionların sosial-iqtisadi inkişafı Dövlət Proqramı çərçivəsində həyata keçirilən tədbirlər nəticəsində 2005-ci ildə aqrar sahədə yüksək göstəricilər əldə edilmişdir. Keçən il 54 min 42 ton taxıl (2004-cü ildəkindən 3 min 647 ton çox), 22 min 506 ton tərəvəz (1.290 ton çox), 41 min 177 ton bostan məhsulu (770 ton çox), 3 min 11 ton pambıq (283 ton çox), 3 min 391 ton üzüm (3 min 73 ton çox), 19 min 342 ton meyvə (2 min 883 ton çox), 12 min 917 ton kartof, 1.200 ton şəkər çuğunduru və s. istehsal edilmişdir.
Rayonda ötən il iribuynuzlu mal-qaranın sayı əvvəlki ildəkinə nisbətən 503 baş artaraq 56 min 860 başa, davarların sayı isə 1.658 baş artaraq 144 min 563 başa çatmışdır. Ət istehsalı 4 min 874 ton (2004-cü ildəkindən 97,5 ton artıq), süd istehsalı 23 min 71 ton (341 ton çox), yumurta istehsalı 11 milyon 179 min ədəd (219 min ədəd çox), yun istehsalı 186 ton (2 ton çox) olmuşdur.
Mövcud suvarma şəbəkələrinin istismarı sahəsində həyata keçirilən tədbirlər aqrar bölmənin inkişafında böyük rol oynamışdır. Keçən il kənd təsərrüfatının maddi-texniki bazasının möhkəmləndirilməsi məqsədi ilə xeyli işlər görülmüşdür. Yaradılmış “Aqrotexservis” mərkəzinə 1 milyard manatlıq yeni texnika gətirilmişdir.
Hazırda rayonda “Aqrolizinq” ASC-nin bazasının yaradılması və servis xidmətinin göstərilməsi istiqamətində tədbirlər görülür.
Rayonda yerli sənaye sürətlə inkişaf edir. Ötən il 74,5 milyard manatlıq sənaye məhsulu istehsal edilmişdir ki, bu da 2004-cü ildəkindən 22,9 faiz çoxdur. Yaşayış evlərinin, xidmət obyektlərinin tikintisi, abadlaşdırma, yol çəkilişi sahələrində diqqətəlayiq uğurlar qazanılıb. Rayonda il ərzində təkcə 24,9 milyard manatlıq və ya 2004-cü ildəkindən 7,1 dəfə çox tikinti işləri aparılmışdır.
Yeni istehsal və xidmət sahələrinin açılması, mövcud istehsal müəssisələrinin fəaliyyətinin genişləndirilməsi təzə iş yerlərinin yaradılmasına, əhalinin məşğulluğunun artırılmasına imkan vermişdir. Ümumilikdə keçən il rayonda 2378 yeni iş yeri açılmışdır ki, bunun 623-ü daimidir.
Bölgənin elektrik enerjisi və təbii qazla təminatı istiqamətində xeyli işlər görülmüşdür. Ötən il “Azəriqaz” QSC-nin qayğısı nəticəsində Ağsu-Kürdəmir magistral boru kəmərinin 5, şəhərdaxili xətlərin isə 10 kilometrlik hissəsi dəyişdirilmiş, Topalhəsənli, Qaraqocalı, Şahsevən, Atakişili, Şıxımlı, Mürtülü, Qağacılı və Dəyirmanlı kəndlərinə təbii qazın verilməsi bərpa edilmişdir. Hazırda daha 6 kənddə mavi alovun yanması üçün lazımi tədbirlər görülür.
Bütün bunlarla yanaşı, elektrik enerjisi və təbii qaz təminatı sahəsində nöqsanlara da yol verilmişdir.
Hesabat ilində rayonda təhsil, səhiyyə, mədəniyyət sahələrində xeyli iş görülmüşdür. Qeyd olunmuşdur ki, təkcə Heydər Əliyev Fondu tərəfindən Karrar kəndində 240, Beyi və Sovla kəndlərinin hər birində isə 100 şagird yerlik yeni məktəb binaları tikilib istifadəyə verilmişdir. Karrar məktəbinin açılışında YUNESKO-nun xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyeva iştirak etmişdir.
Ayrı-ayrı xidmət sahələrinin, o cümlədən rabitənin inkişaf etdirilməsi istiqamətində həyata keçirilən tədbirlərlə yanaşı, mövcud çatışmazlıqlar da ətraflı təhlil olunmuşdur.
Hesabat yığıncağında regionların sosial-iqtisadi inkişafı Dövlət Proqramından irəli gələn vəzifələrin bu il uğurla həyata keçirilməsi üçün mövcud imkanların maksimum səfərbərliyə alınacağı bildirilmişdir. Əsas diqqət Proqramın ali məqsədinə, insanların rifah halının yaxşılaşdırılmasına, yeni istehsal sahələrinin açılmasına, iş yerlərinin yaradılmasına yönəldiləcəkdir.
Hesabat yığıncağında Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev, Milli Məclisin deputatı Fərhad Qədirov çıxış etmişlər.
Yığıncaqda müzakirə olunan məsələ ilə əlaqədar qərar və Azərbaycan Respublikasının Prezidenti İlham Əliyevə müraciət qəbul olunmuşdur.
Bölmənin digər xəbərləri
