Kürdəmirdə ulu öndərimiz Heydər Əliyevin 90 illik yubileyinə həsr olunmuş ağacəkmə aksiyası keçirilir
Kürdəmir, 4 fevral (AZƏRTAC). Kürdəmirdə ümummilli liderimiz Heydər Əliyevin anadan olmasının 90 illik yubileyinə həsr edilmiş ağacəkmə aksiyasına başlanılmışdır.
AZƏRTAC xəbər verir ki, rayon ağsaqqallarının təşəbbüsü ilə keçirilən aksiya may ayınadək davam etdiriləcəkdir. Ayrı-ayrı əmək kollektivləri hər həftənin şənbə günündə rayon ərazisində nəzərdə tutulmuş ərazilərə, o cümlədən küçə və parklara, yol kənarlarına ağac əkəcəklər.
İlk vaxtlardan etibarən sakinlər aksiyada fəallıq nümayiş etdirirlər. Hər həftə iməciliklərdə 1000 nəfərədək sakin iştirak edir. Hələlik ağac şitilləri Kürdəmir-Ağsu magistral yolunun Köhnəbazar və Cəyli kəndlərinin ərazisindən keçən hissəsinə əkilir. Əkində əsasən yerli şərait üçün daha əlverişli olan sərv, şam, qovaq ağaclarının şitillərindən istifadə olunur.
Rayonun bütün idarə, müəssisə və təşkilatlarının, xüsusilə təhsil, mədəniyyət sahələrinin, maliyyə, Aşağı Şirvan kollektorların istismarı idarələrinin və s. kollektivləri ilk vaxtlardan etibarən aksiyada fəallıq göstərirlər.
İndiyədək Kürdəmir-Ağsu yolunun kənarlarına 5000 ədəd ağac şitili əkilmişdir.
Bölmənin digər xəbərləri
