Laçın Beynəlxalq Hava Limanının açılışı geostrateji mesaj daşıyan hadisədir - ŞƏRH
Bakı, 30 may, AZƏRTAC
Laçın Beynəlxalq Hava Limanının rəsmi açılışı, Prezident Müzəffər Ali Baş Komandan İlham Əliyevin rəhbərliyi ilə əldə edilmiş tarixi Zəfərdən sonra işğaldan azad olunmuş ərazilərdə həyata keçirilən sistemli və məqsədyönlü bərpa-quruculuq strategiyasının növbəti əlamətdar mərhələsidir. Bu mühüm infrastruktur layihəsi, həm logistik imkanların genişləndirilməsi, regional və beynəlxalq nəqliyyat əlaqələrinin inkişafı baxımından mühüm əhəmiyyət daşıyır, həm də Azərbaycanın dövlət suverenliyinin və ərazi bütövlüyünün beynəlxalq aləmdə açıq və qətiyyətli şəkildə təsdiqi kimi çıxış edir.
Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.
O bildirib ki, Laçın Hava Limanının açılışı təkcə texniki və iqtisadi layihə deyil, həm də siyasi və geostrateji mesaj daşıyan hadisədir. Bu hava limanı Qarabağın, Zəngəzurun və bütövlükdə Azərbaycanın inteqrasiyasını təmin edən, yeni reallıqlara əsaslanan regionun inkişaf vizyonunun konkret təzahürüdür.
Xüsusilə qeyd etmək lazımdır ki, Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərifin iştirakı ilə Laçında baş tutan üçtərəfli Zirvə görüşü, qardaş ölkələr arasında siyasi, iqtisadi və təhlükəsizlik sahələrində yüksəksəviyyəli strateji tərəfdaşlığın göstəricisidir. Bu görüş, eyni zamanda, Azərbaycan-Türkiyə-Pakistan üçlüyünün regional sabitliyə, təhlükəsizliyə və davamlı inkişafa verdiyi töhfənin bariz nümunəsidir.
“Bu üçtərəfli əməkdaşlıq formatı yalnız regional çərçivə ilə məhdudlaşmır, eyni zamanda, beynəlxalq miqyasda milli maraqların müdafiəsi, beynəlxalq hüququn qorunması və müstəqil dövlətlərin suveren iradəsinin təmin olunması baxımından da nüfuzlu platformaya çevrilir. Məhz bu birlik, yeni dünya düzənində Türk-İslam həmrəyliyinin və qarşılıqlı hörmətə əsaslanan əməkdaşlıq modelinin möhkəmlənməsində aparıcı rol oynayır", - deyə Günay Ağamalı vurğulayıb.
Deputat əlavə edib ki, qardaş Türkiyə və Pakistanın müdafiə sənayesi sahəsində əldə etdiyi nailiyyətlər nəticəsində istehsal olunan müasir, yüksək texnologiyalı hərbi məhsulların Azərbaycan Silahlı Qüvvələrinin inventarına daxil edilməsi isə bu üçtərəfli əməkdaşlığın hərbi-strateji ölçüsünün də gücləndiyini təsdiqləyir. Bu, təkcə Azərbaycan Ordusunun döyüş qabiliyyətinin yüksəldilməsinə deyil, eyni zamanda, regionda balanslaşdırılmış və dayanıqlı təhlükəsizlik arxitekturasının formalaşmasına xidmət edir.
“Laçında istifadəyə verilən bu müasir hava limanı həm də Türk-İslam dünyasının mənəvi birliyinin, strateji həmrəyliyinin və ortaq gələcəyinin simvoluna çevrilib. Bu layihə ölkəmizin inkişaf və güc siması, dost və qardaş ölkələrin birgə iradəsinin və ortaq dəyərlərə söykənən əməkdaşlığının parlaq göstəricisidir.
Dövlətimizin başçısının rəhbərliyi ilə həyata keçirilən məqsədyönlü daxili və xarici siyasət nəticəsində ölkəmiz təkcə regionda deyil, həm də daha geniş beynəlxalq müstəvidə siyasi nüfuz sahibi, əməkdaşlığa açıq və öz iradəsi ilə proseslərə yön verən aparıcı dövlətə çevrilib. Laçında gerçəkləşən bu Zirvə görüşü və strateji layihələr, məhz bu uzaqgörən və milli maraqlara əsaslanan dövlət siyasətinin bəhrəsidir”, - deyə Günay Ağamalı bildirib.
Bölmənin digər xəbərləri
