Laçında strateji əhəmiyyətə malik hava limanının açılması hər birimiz üçün fəxr mənbəyidir ŞƏRH
Bakı, 29 may, AZƏRTAC
Mayın 28-də Laçında Azərbaycan Prezidenti İlham Əliyevin, Türkiyə Prezidenti Rəcəb Tayyib Ərdoğanın və Pakistanın Baş naziri Məhəmməd Şahbaz Şərifin Zirvə görüşü keçirilib. Elə həmin gün tarixi bir prosesin nəticəsi olaraq, Azərbaycan üçün xüsusi strateji və milli əhəmiyyətə malik olan Laçın Beynəlxalq Hava Limanının açılış mərasimi böyük uğurla həyata keçirildi. Bu möhtəşəm tədbirdə iki ölkənin dövlət başçısı Prezident İlham Əliyev və Türkiyə Prezidenti Rəcəb Tayyib Ərdoğan, eləcə də Pakistanın Baş naziri Şahbaz Şərifin iştirakı hadisənin beynəlxalq səviyyədə nə qədər önəmli olduğunu bir daha göstərdi. Laçın Beynəlxalq Hava Limanın açılışı 2020-ci ildə torpaqlarımızın işğaldan azad olunması, 2023-cü ildə həyata keçirilən antiterror tədbirləri və nəticədə ölkə ərazisində tam suverenliyin bərpa olunması kimi tarixi mərhələlərin məntiqi davamıdır. “Konstitusiya və Suverenlik İli” çərçivəsində Laçında belə mühüm infrastruktur layihəsinin gerçəkləşdirilməsi həm milli, həm beynəlxalq, həm də regional baxımdan strateji əhəmiyyət daşıyır.
Bu layihə Prezident İlham Əliyevin uzaqgörən, milli maraqlara əsaslanan və insan mərkəzli siyasətinin bariz təzahürüdür. Hava limanının açılışı ilə verilən mesaj aydındır: Azərbaycan sülhə, sabitliyə, təhlükəsizliyə və regional inkişafa sadiqdir. Eyni zamanda, hər hansı bir təhdid və ya təxribata qarşı dövlətimizin güclü iradəsi və “dəmir yumruğu” hər zaman hazır vəziyyətdədir.
Bu fikirləri AZƏRTAC-a açıqlamasında Bakı İctimai Əməkdaşlıq Mərkəzinin sədri Rauf Zeyni söyləyib.
R.Zeyni qeyd edib ki, otuz il həsrətlə gözlədiyimiz torpaqlarımız artıq azaddır. İndi isə Qarabağın bərpası və Böyük Qayıdış prosesi uğurla icra olunur: “Bu proqram çərçivəsində infrastruktur quruculuğu, yaşayış şəraitinin yaradılması və regionun dirçəldilməsi intensiv şəkildə davam etdirilir. Laçın Beynəlxalq Hava Limanı da bu genişmiqyaslı bərpa və inkişaf prosesinin mühüm bir hissəsidir. Əminəm ki, bu mühüm hadisə və əldə olunan nailiyyətlər həm Azərbaycan cəmiyyəti, həm də dünya azərbaycanlıları tərəfindən böyük qürur və sevinc hissi ilə qarşılanır. Bu inkişaf bizə, xalqımıza yeni ruh və ümid verir. Çünki Qarabağ Azərbaycandır! Bu ideya, həmçinin ona xidmət edir ki, biz Qərbi Azərbaycana da qayıdış konsepsiyasını uğurla həyata keçirəcəyik. Bu münasibətlə bütün xalqımızı xüsusilə laçınlıları və cəbrayıllıları səmimi-qəlbdən təbrik edirəm. Laçında strateji əhəmiyyətə malik belə bir hava limanının açılması hər bir vətəndaşımız üçün fəxr və sevinc mənbəyidir. Bundan sonra Azərbaycan beynəlxalq arenada, regionda daha da güclənəcək və öz nüfuzunu artıracaq. Qoy, bu nailiyyətlər xalqımızın rifahına, dövlətimizin qüdrətinə və bölgədə sülhə xidmət etsin”, - deyə R.Zeyni vurğulayıb.
Bölmənin digər xəbərləri
