Laçının Azərbaycanın nəzarətinə keçməsi erməni separatizminə vurulan ən böyük zərbədir - Politoloq
Bakı, 28 avqust, AZƏRTAC
Ermənistan Laçın rayonunu 28 il işğalda saxlayaraq talan edib. Laçın strateji mövqeyinə görə çox önəmli yerdir və Qarabağ iqtisadi rayonunu Ermənistanla birbaşa birləşdirir. 1992-ci ildə Laçının itirilməsi digər rayonların da işğal edilməsini sürətləndirdi. İşğal müddətində aparılan sülh danışıqlarında və təklif olunan həll planlarında Ermənistan Laçını qaytarmayacağını bildirirdi. İkinci Qarabağ müharibəsində əldə etdiyimiz Qələbə ilə digər rayonlar kimi Laçınının da uzunmüddətli işğalına son qoyuldu. Ermənistanın imzaladığı kapitulyasiya aktı ilə Laçın rayonu 2020-ci il dekabrın 1-də bizə geri qaytarıldı. 2022-ci ilin avqust ayının 26-da isə Laçın şəhərində və digər yaşayış məntəqələrində suverenliyimiz təmin olundu. Bu gün Laçın şəhəri, dəhlizi, yolu və sərhəd-buraxılış məntəqəsi Azərbaycanın tam nəzarətindədir. Bu da erməni separatizminə vurulan ən böyük zərbədir.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Politoloq qeyd edib ki, işğaldan azad edilmiş digər ərazilərimiz kimi Laçın rayonunda da sürətlə böyük quruculuq və abadlıq işləri aparılır. Dövlətimizin başçısı bu müddətdə Laçın rayonuna çoxsaylı səfərlər edib. Böyük Qayıdış proqramı çərçivəsində Laçın rayonunun sakinləri də uzun müddətdən sonra öz torpaqlarına qayıdaraq yaşamağa başlayıblar.
“İşğaldan azad edilmiş ərazilər üzrə Prezident İlham Əliyevin 2023-cü il 31 iyul tarixli Sərəncamı ilə şəhər günləri təsis edilərək rayonlar üzrə qələbə tarixləri rəsmiləşdirildi. Avqustun 26-sı da Laçın Şəhəri Günü olaraq təntənəli şəkildə keçirildi. Dövlətimizin başçısının və birinci xanımın iştirakı tədbirə olan diqqəti və əhəmiyyəti daha da artırdı. Tədbir çərçivəsində laçınlılarla görüşü, uşaqlarla və böyüklərlə səmimi söhbətləri Prezident İlham Əliyevə olan inamı, sevgini təcəssüm etdirir və xalq-dövlət-rəhbər birliyini göstərir. Müasir standartlara uyğun aparılan yenidənqurma və böyük quruculuq işləri, sakinlərin öz dədə-baba torpaqlarına sevinclə dönüşü, təbiətin bərpası məqsədilə görülən tədbirlər torpaqların kimə məxsusluğunu da sübut edir.
Azərbaycan Prezidenti həm ictimaiyyətlə görüş zamanı, həm də tədbir çərçivəsində çıxışında regionda sülhün əldə olunmasının qarşısını almağa çalışan, yeni reallıqları qəbul etməyərək təxribatlarını davam etdirən qüvvələrə bir daha Azərbaycan dövlətinin məqsədini, siyasi iradəsini çatdırdı. “Laçın” dövlət sərhədindən buraxılış məntəqəsini qurmaqla öz sərhədlərinin təhlükəsizliyini təmin edən ölkəmizə qarşı qarayaxma kampaniyası aparan, beynəlxalq ictimaiyyəti aldatmağa çalışaraq Azərbaycana qarşı qərarların çıxarılmasına çalışan Fransaya, Nikol Paşinyandan daha çox erməni olmağı özünə məqsəd seçən Emmanuel Makrona bildirildi ki, “Azərbaycanı heç kim və heç nə öz yolundan döndərə bilməz”, - deyə Y.Hacızadə vurğulayıb.
O əlavə edib ki, bu gün ölkəmiz regionda siyasi, iqtisadi, hərbi və hüquqi üstünlüyə malikdir. Beynəlxalq hüquq ərazilərimizi qorumaq, suverenliyimizi təminetmə təminatı verir. Laçında və işğaldan azad olunmuş digər ərazilərdə aparılan işlər də bu üstünlüklərin verdiyi imkanlardır. Eyni zamanda, Azərbaycanın, onun rəhbərinin siyasi gücünü, dövlətimizin və xalqımızın öz məqsədlərindən geri çəkilməyəcəyini bildirir.
Bölmənin digər xəbərləri
