LAÇINLILAR ÖTƏN İLİN YEKUNLARINI MÜZAKİRƏ ETMİŞLƏR
Hesabat məruzəsi ilə çıxış edən rayon icra hakimiyyətinin başçısı Elbrus Təhməzov respublikamızın müxtəlif bölgələrində müvəqqəti məskunlaşmış laçınlıların hər cür dövlət qayğısı ilə əhatə olunduğunu bildirmişdir. Natiq qeyd etmişdir ki, ümummilli liderimiz Heydər Əliyev tərəfindən müəyyənləşdirilmiş inkişaf strategiyasını bu gün ölkə Prezidenti İlham Əliyevin məharətlə davam etdirməsi uğurlu nəticələr qazanmağa şərait yaratmışdır. Həyata keçirilən daxili və xarici siyasət, sosial-iqtisadi islahatlar ölkəmizin beynəlxalq aləmdə imicini möhkəmləndirmiş, iqtisadi inkişafına təkan vermiş, bütün sahələrdə böyük nailiyyətlər əldə edilmişdir. Azərbaycan Prezidenti İlham Əliyevin 2004-cü il 1 iyul Sərəncamı ilə “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı” təsdiq olunmuşdur. Proqrama əsasən müxtəlif bölgələrdə müvəqqəti məskunlaşmış qaçqın və məcburi köçkünlərin yaşadığı çadır düşərgələrinin ləğv edilməsi, yeni müasir qəsəbələrin salınması, digər həlli vacib məsələlərin həyata keçirilməsi nəzərdə tutulmuşdur.
Ötən il Bərdə və Ağcabədi rayonları ərazisində çadır düşərgələrində müvəqqəti məskunlaşmış 37, Sabirabad və Saatlı rayonları ərazisində çadır şəhərciklərində yaşayan 22 məcburi köçkün ailəsi üçün “Taxta körpü”də yeni qəsəbələrin tikintisinə başlanmışdır. Həmin qəsəbələrdə inşaat işləri başa çatmaq üzrədir. Regionların sosial-iqtisadi inkişafı Dövlət Proqramına əsasən bölgələrdə vüsət alan geniş tikinti-abadlıq işlərində rayonumuzun məcburi köçkünləri də yaxından iştirak edirlər. Bir sıra idarə və müəssisələrin fəaliyyəti bərpa olunur, təhsil, səhiyyə, rabitə obyektləri tikilir, fərdi xidmət, ticarət, ictimai iaşə müəssisələri aparılır.
Qeyd edilmişdir ki, ötən il qış yataqlarının ən ciddi problemi olan su təminatı sahəsində xeyli iş görülmüş, “Taxta körpü” - Kato magistral su xəttindən Vağazin obasına yeni su xətti çəkilmiş, Qaradolaq artezianından Nurəddin, Ərdəşəvi, Alxaslı və Şeylanlı obalarına gedən su xətti təmir olunmuşdur. Mərkəzi su anbarına gedən su xəttində də təmir-bərpa işləri aparılmışdır. Prezident İlham Əliyevin tapşırığı ilə qış yatağındakı obaları suvarma suyu ilə təmin etmək üçün Qarqar çayından 8,6 kilometr uzunluğunda beton kanalın tikintisinə başlanmışdır. Bu şəbəkənin yaradılmasına 11,3 milyard manat vəsait ayrılmışdır. Qarakeçdi obalarına Ağcabədi rayon ərazisindən gələn K-3 kanalının üzərində yeni nasos stansiyası tikilmiş və 2,4 kilometr uzunluğunda yeni tökmə torpaq kanalı çəkilmişdir. Yeni subartezian quyuları istifadəyə verilmiş, 20 bulaq inşa edilmişdir. Qış yataqlarının obalarındakı suvarma kanallarının 37,6 kilometri lildən təmizlənmişdir.
Əhalinin elektrik enerjisinə olan tələbatını ödəmək üçün “Taxta körpü” qəsəbəsində 250 kilovatlıq, Hacılar obasında 160 kilovatlıq, Alxaslı, Qarakeçdi obalarının hər birində 100 kilovatlıq transformatorlar quraşdırılmış, Ərdəşəvi, Sadınlar, Murik, Vağazin, Fingə, Ağcakənd və Mişni obalarındakı transformatorlar təmir olunmuşdur. 35\010 kilovatlıq “Mil massivi” yarımstansiyasında yağ açarı təmir olunaraq işə salınmışdır. 10 min metrədək elektrik xətti yenisi ilə əvəz edilmiş, 30 min metrədək hava xəttində əsaslı təmir işləri aparılmışdır.
Müşavirədə qeyd olunmuşdur ki, ötən il “Taxta körpü” - Mais yolunun 2 kilometri yenidən qurulmuş, Vağazin-Mişni yolunda 1,8 kilometr, Mais-Alxaslı yolunda 2,2 kilometr məsafəyə çınqıl döşənmişdir. Daxili imkanlar hesabına Ağcabədi-Zərdab yolunun bir kilometrinə asfalt döşənmişdir.
Hesabat dövründə təhsil və səhiyyə obyektlərinin tikintisinə xüsusi diqqət yetirilmişdir. Alxaslı qış yatağında müasir tələblərə cavab verən 100 yerlik, yeni məktəb binası inşa edilmiş, “Taxta körpü” qəsəbə, Qarakeçdi 2 nömrəli, Ağbulaq, Bakının Nərimanov rayonunda fəaliyyət göstərən Bozlu, Əzizbəyov rayonunun Buzovna qəsəbəsində fəaliyyət göstərən Quşçu, Abşeron rayonunda fəaliyyət göstərən Səfiyan məktəbləri, Fingə və Təzəkənd obalarındakı həkim məntəqələri əsaslı təmir olunmuş, Şeylanlı, Kamallı, Malıbəy, Cağazur obalarında kənd ərazi vahidi üzrə nümayəndəliklər üçün inzibati binalar tikilmişdir.
Laçınlı məcburi köçkünlərin məskunlaşdığı 50-dən çox şəhər və rayonda icra hakimiyyətinin səlahiyyətli nümayəndələri fəaliyyət göstərirlər. Nümayəndələr qaçqın və məcburi köçkünlərin yaşayış şəraitinin yaxşılaşdırılması, məşğulluğunun təmin edilməsi üçün tədbirlər hazırlayıb həyata keçirirlər.
Yığıncaqda bildirilmişdir ki, 2005-ci ildə 11,250 sentner ət, 50,448 sentner süd, 2,963 sentner yun, 992 min ədəd yumurta istehsal olunmuşdur. Əhaliyə 76 milyon manatlıq ticarət xidməti göstərilmiş, 7538, 3 milyon manatlıq tikinti-abadlıq işləri görülmüşdür. 250-dən çox yaşayış məntəqəsində müvəqqəti məskunlaşmış laçınlı köçkünlər inanırlar ki, ölkə Prezidenti İlham Əliyevin apardığı çevik daxili və xarici siyasət nəticəsində Dağlıq Qarabağ münaqişəsi sülh yolu ilə öz həlini tapacaq, məcburi köçkünlər, qaçqınlar öz doğma yurd-yuvalarına qayıdacaqlar.
Müşavirədə 2006-cı ildə qarşıda çox mühüm vəzifələrin durduğu diqqətə çatdırıldı, bildirildi ki, qaçqın və məcburi köçkünlərin yaşayış şəraitinin yaxşılaşdırılması, məşğulluğunun təmin edilməsi üçün vəzifəli şəxslər daha səylə çalışmalı, işlərində dönüş yaratmalıdırlar. Tənqid və özünütənqid ruhunda keçən hesabat yığıncağında il ərzində görülən işlər ətraflı təhlil edildi, nöqsanları doğuran səbəblər açıqlandı, konkret təkliflər verildi.
Hesabat yığıncağında çıxış edən Baş nazirin müavini, Dövlətqaçqınkomun sədri Əli Həsənov ölkəmizin Prezidenti İlham Əliyevin qaçqın və köçkünlərə qayğısından, bu sahədə həyata keçirilən tədbirlərdən, görülən işlərdən danışmış, onların bütün problemlərinin həlli üçün bundan sonra da təsirli tədbirlər görüləcəyini bildirmişdir.
Məruzə ətrafında çıxış edənlər dövlət tərəfindən qaçqın və köçkünlərə göstərilən diqqət və qayğıya görə Prezident İlham Əliyevə minnətdarlıqlarını bildirmişlər.
Yığıncaqda Prezidentin İcra Aparatının məsul işçisi Vüqar Hüseynov, Nazirlər Kabinetinin şöbə müdiri Qurban Sadıqov, Milli Məclisin deputatı Sevindik Hətəmov iştirak etmişlər.
Bölmənin digər xəbərləri
