İDMAN
Lənkəran və Ağsuda yarışların idarəetmə sisteminin tətbiqi ilə bağlı treninqlər keçirilib
Bakı, 3 iyun, AZƏRTAC
2022-ci, 2023-cü illər mövsümünə hazırlıqla əlaqədar oğlanlar, qızlar, həvəskarlar, Region Liqası və futzal liqalarındakı komandaların nümayəndələri və onlayn qeydiyyatını aparacaq şəxslərlə görüşlər keçirilib.
AZƏRTAC AFFA-ya istinadla xəbər verir ki, növbəti belə treninqlər iyunun 2-də Lənkəranda, 3-də isə Ağsuda təşkil olunub.
Görüşlərdə yeni mövsüm üçün qeydiyyatın başlanması və son tarixləri, qeydiyyat zamanı yeni tətbiq ediləcək sənəd (azyaşlı həvəskar futbolçu təlim müqaviləsi), dəyişən qeydiyyat qaydaları və “Futbola qoşul” onlayn qeydiyyat platformasında yeni tətbiq ediləcək “Yarışların idarəetmə sistemi” bölməsi haqqında məlumatlar verilib.
Yarışların idarəetmə sistemi “Futbola qoşul” onlayn qeydiyyat sistemi ilə vahid bir platforma üzərində sinxronlaşdırılıb.
Yeni sistem futbol idarəetməsinin müxtəlif sahələrində müasir rəqəmsal idarəetmə üsullarının tətbiqini davam etdirmək və təkmilləşdirmək imkanları verəcək.
Qeyd edək ki, yarışların idarəetmə sisteminin tam tətbiqi 2023-cü, 2024-cü illər mövsümündən nəzərdə tutulur.