Litvanın nüfuzlu xəbər portalında Azərbaycanın üzləşdiyi mina problemi haqqında məqalə dərc olunub
Bakı, 30 iyun, AZƏRTAC
Litvanın nüfuzlu www.alfa.lt xəbər portalında “Görünməz düşmənlər: Müharibədən sonra minaların qlobal təsiri” sərlövhəli məqalə dərc edilib.
Bu barədə AZƏRTAC-a Azərbaycanın Litvadakı səfirliyindən məlumat verilib.
Bildirilib ki, məqalədə İkinci Qarabağ müharibəsi başa çatdıqdan sonra Azərbaycanın üzləşdiyi mina problemi, işğaldan azad edilmiş ərazilərimizin minalardan təmizlənməsi istiqamətində görülən işlərdən bəhs olunur, mina probleminin tək Azərbaycanda deyil, müharibədən əziyyət çəkən digər ölkələrdə də qlobal bir problem olduğu vurğulanır.
Yazıda qeyd edilir ki, minalar münaqişə bitdikdən sonra da insanlar üçün ciddi təhlükə yaradır. Azərbaycanda da mina problemi təhlükəsizliyə və inkişafa mane olur. Ermənistanın hərbi təcavüzü nəticəsində Qarabağ 30 il işğal altında qalıb və ərazilər geniş minalanıb. Ermənistan minaların dəqiq xəritələrini tam verməkdən imtina edir, təqdim olunan xəritələrin yalnız 25 faizi dəqiq hesab edilir, bu da minatəmizləmə işlərini ləngidir. Bu vəziyyət təxminən bir milyona yaxın məcburi köçkünün təhlükəsiz qayıdışına mane olur.
Məlumat verilir ki, Azərbaycan mina təmizləmə fəaliyyətini müstəqil şəkildə həyata keçirir. 2020-ci ildən etibarən Azərbaycan Respublikasının Minatəmizləmə Agentliyi (ANAMA) tərəfindən 200 min hektara yaxın ərazi partlayıcı qurğulardan təmizlənib, 191 mindən çox mina və partlamamış hərbi sursat zərərsizləşdirilib. Hazırda bölgədə 1900-dən çox peşəkar minaaxtaran, 100-dən artıq minaaxtaran it və müasir texnika ilə təchiz olunmuş avadanlıqlar fəaliyyət göstərir.
Portal Azərbaycan dövlətinin maarifləndirmə işlərinə də xüsusi diqqət yetirir. Bildirilir ki, 2020-ci ildən bəri 500 mindən çox insan mina təhlükəsi barədə maarifləndirilib, azad edilmiş ərazilərdə xəbərdarlıq nişanları yerləşdirilib, məktəblilərə isə bu təhlükə ilə qarşılaşdıqda necə davranmaları öyrədilir.
Məqalədə, həmçinin mina partlayışından zərər çəkmiş şəxslərə göstərilən tibbi, psixoloji və sosial dəstək tədbirlərinə toxunulur, 4 Aprel – Beynəlxalq Mina Xəbərdarlığı və Minatəmizləmə Fəaliyyətinə Yardım Günü münasibətilə Bakıda keçirilmiş futbol yoldaşlıq oyunu mina qurbanlarının cəmiyyətə reinteqrasiyasına verilən dəstəyin simvolu kimi təqdim olunur.
Yazıda Azərbaycanın xüsusilə bu sahədə beynəlxalq əməkdaşlığa önəm verdiyi, minalarla mübarizənin BMT-nin Dayanıqlı İnkişaf Məqsədləri sırasına daxil edilməsi təşəbbüsünü irəli sürdüyü və artıq üç beynəlxalq konfransa uğurla ev sahibliyi etdiyi qeyd olunur. Ötən il mayın 30-31-də Zəngilan və Bakıda keçirilmiş konfransların Azərbaycanın COP29 çərçivəsində ətraf mühitə və təhlükəsizliyə verdiyi əhəmiyyətin göstəricisi olduğu bildirilir.
Sonda Azərbaycanın mina təhlükəsi ilə təkbaşına mübarizə apardığı, lakin beynəlxalq maliyyə dəstəyinin yetərli olmadığı vurğulanır. Litva portalı bu vəziyyəti humanitar və insan hüquqları məsələsi kimi dəyərləndirərək, dünya ictimaiyyətini daha geniş dəstək verməyə çağırır.
Bölmənin digər xəbərləri
