LONDONDA “AZƏRBAYCAN EVİ”NİN YENİ BİNASININ AÇILIŞI OLACAQDIR
AZƏRTAC xəbər verir ki, gələn ilin fevralında Londonda “Azərbaycan evi”nin yeni binasının açılış mərasimi olacaqdır.
“Azərbaycan evi”nin rəhbəri Vüsal Həmzəyev bildirmişdir ki, Azərbaycan Respublikasının mədəniyyət mərkəzi rolunu oynayan bu qurum bir il əvvəl Londondakı azərbaycanlı gənclər klubu və ziyalılar tərəfindən yaradılmasına baxmayaraq hələ də bina ilə təmin olunmamışdır. Sonradan Azərbaycan əsilli bir xeyriyyəçi tərəfindən quruma Londonun mərkəzinə yaxın yerdə bina verilmiş və orada təmir işləri aparılmışdır. Həmin binada yerləşəcək “Azərbaycan evi”nin gələn ilin fevralında açılış mərasiminin keçirilməsi planlaşdırılır. Mərasimdə Azərbaycandan rəsmi nümayəndələrin, sənətçilərin iştirakı planlaşdırılır.
V.Həmzəyev demişdir ki, binanın kitabxanası, iclas zalı, musiqi studiyası vardır. Qurum Azərbaycana dair müxtəlif dillərdə kitablar toplayır.
Bundan başqa, Londondakı “Azərbaycan evi” Azərbaycanlı Tələbələrin Avropa Forumu ilə birgə fevral ayında gənclər Forumu keçirəcəkdir.
V.Həmzəyevin dediyinə görə, Londonda 30 mindən çox azərbaycanlı yaşayır.
Bölmənin digər xəbərləri
