Londonda yaşayan deputat Banqladeşdə iki il həbs cəzasına məhkum edilib
London, 1 dekabr, AZƏRTAC
Leyboristlər Partiyasının deputatı və sabiq nazir Tulip Siddiq Banqladeşdə korrupsiya iddiaları ilə bağlı onun iştirakı olmadan keçirilən məhkəmə prosesində iki il həbs cəzasına məhkum edilib.
AZƏRTAC BBC-yə istinadla xəbər verir ki, o, daha 16 nəfərlə birlikdə mühakimə olunub. İddialara görə T.Siddiq sabiq Baş nazir Şeyx Hasinanın yaxın qohumu kimi xüsusi nüfuzundan istifadə edərək ailəsinə paytaxt Dəkkənin kənarında torpaq sahəsi əldə edilməsinə təsir göstərməkdə təqsirli bilinib. Lakin deputat bütün ittihamları qəti şəkildə rədd edib. Londonun Hampstead və Highgate dairəsini təmsil edən T.Siddiqin faktiki olaraq həbs cəzasını çəkməsi gözlənilmir. O, Banqladeşdə barəsində açıq qalan bir neçə digər ittihamla da üzləşir.
Şeyx Hasina hökumətinin devrilməsindən sonra Banqladeş prokurorluğu keçmiş Baş nazirlə, onun tərəfdarları və ailə üzvləri ilə bağlı çoxsaylı hüquqi proseslərə start verib. Məhkəmə sənədlərində prokurorlar Siddiqin xüsusi nüfuzundan istifadə edərək anası Rehana Siddiq, bacısı Azmina Siddiq və qardaşı Radvan Siddiq üçün torpaq sahəsinin ayrılmasına təsir göstərdiyini iddia ediblər. T.Siddiqin vəkilləri bu iddianı rədd edərək “Financial Times”a bildiriblər ki, o, heç vaxt Banqladeş kimlik kartına malik olmayıb və uşaqlıqdan bəri pasport daşımayıb.
Hakim Rabiul Əlamın qərarına əsasən, deputat iki il həbs cəzasına və 100 min Banqladeş takası - təxminən 821 dollar məbləğində cəriməyə məhkum edilib. Cərimə ödənilmədiyi halda cəzaya əlavə olaraq altı ay həbs müddəti artırılacaq.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
