“Los Angeles Times”ın ispandilli versiyası: Ermənistan Azərbaycana qarşı cinayətlər törədib
Vaşinqton, 17 fevral, AZƏRTAC
ABŞ-ın “Los Angeles Times” qəzetinin ispandilli versiyası - “Hoy Los Angeles” həftəliyi Azərbaycanın Los-Ancelesdəki baş konsulu Nəsimi Ağayevdən götürülmüş videomüsahibə əsasında məqalə dərc edib. Qeyd edək ki, 1 milyon tiraja malik “Hoy Los Angeles” qəzeti ABŞ-ın ən böyük ispandilli mətbu orqanıdır.
Baş konsul müsahibədə Azərbaycanın yerləşdiyi mürəkkəb bölgə, yürütdüyü tarazlaşdırılmış xarici siyasət, müxtəlif dövlətlərlə qurduğu münasibətlər barədə söhbət açıb. Ölkəmizin beynəlxalq terrorizmlə mübarizəyə töhfələrindən bəhs edən diplomat ötən əsrin 90-cı illərində Azərbaycana qarşı törədilmiş terror aktları barədə danışıb. O, Ermənistanın Azərbaycana qarşı işğalçılıq və etnik təmizləmə siyasəti barədə də məlumat verib.
Qəzetin baş redaktoru Aleksandro Masielin müəllifi olduğu məqalədə isə Azərbaycanın müstəqilliyini bərpa etdikdən sonra keçdiyi uğurlu inkişaf yolu, özünün neft və qaz ehtiyatlarından ağılla istifadə edərək qlobal strateji önəm qazanması və Qafqaz bölgəsində həqiqi gücə çevrilməsi qeyd olunur. Azərbaycanın çoxəsrlik tolerantlıq və dünyəvilik ənənələrinə toxunan müəllif bu gün ölkəmizdə müsəlmanların, xristianların və yəhudilərin sülh və əmin-amanlıq şəraitində yaşadıqlarını diqqətə çatdırır.
A.Masiel Azərbaycan ərazisinin bir hissəsinin Ermənistan silahlı qüvvələri tərəfindən işğal olunduğunu, bir sıra beynəlxalq təşkilatların bununla bağlı qətnamələr qəbul etdiyini vurğulayır. Həmin qətnamələrdə Ermənistan tərəfindən Azərbaycana təcavüz edildiyi, etnik təmizləmə siyasəti həyata keçirildiyi və insanlığa qarşı digər cinayətlər törədildiyi bildirilir. Müəllif Kaliforniyada erməni lobbisinin Azərbaycana qarşı intensiv fəaliyyət göstərdiyini də diqqətə çatdırır.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
