Macarıstan millisinin hücumçusu: Azərbaycan yığmasının güclü liqalarda oynayan futbolçuları var – EKSKLÜZİV MÜSAHİBƏ
Bakı, 4 iyun, AZƏRTAC
Macarıstan millisinin futbolçusu Martin Adam ölkəsinin Azərbaycan yığması ilə keçirəcəyi yoldaşlıq oyunu ilə bağlı AZƏRTAC-a eksklüziv müsahibə verib.
- İyunun 10-da Azərbaycan millisi Bakıda Macarıstan yığması ilə yoldaşlıq görüşü keçirəcək. Həmin qarşılaşma barədə nə deyə bilərsiniz?
- Bu, yoldaşlıq oyunudur. Hər iki komandanın baş məşqçisi yeni futbolçularını və oyun planlarını yoxlamağa çalışacaq. Bu cür matçlar gənc oyunçular üçün əla fürsətdir. İki yığmanın Millətlər Liqasındakı əvvəlki matçlarına və bu günə qədər öz aralarında keçirdikləri oyunlara nəzər salsaq, Macarıstanın favorit olduğunu görə bilərik. İnanıram ki, futbolçularımız bu işin öhdəsindən layiqincə gələcəklər.
- Azərbaycan millisini necə xarakterizə edərdiniz?
- Azərbaycan millisinin əksər futbolçuları ölkənizin ən məşhur komandası olan “Qarabağ”da çıxış edirlər. Cənubi Koreya, Polşa və 2-ci Bundesliqa kimi güclü liqalarda oynayan bir neçə futbolçunuz da var. Milli komandanın məşqçilər korpusu daim onlara güvənir.
- Milli komandamızı portuqaliyalı təcrübəli mütəxəssis Fernandu Santuş çalışdırır. Onun haqqında hansı fikirdəsiniz?
- Santuş çox təcrübəli mütəxəssisdir. Lakin Azərbaycan millisi onun rəhbərliyi altında qələbə qazana bilməyib. Millətlər Liqasında İsveçlə səfərdəki və Slovakiya ilə Bakıdakı oyunları çıxsaq, komandanız digər matçlarda yaxşı mübarizə apardı. Estoniyaya qarşı evdəki görüşdə irəliləyişin olduğunu gördük. Həmin oyun heç-heçə ilə başa çatmışdı.
- Sizcə, Fernandu Santuş Azərbaycan yığmasında ciddi uğurlara imza ata bilər?
- Onunla heç tanışlığım yoxdur. Rəhbərlik etdiyi komandalara qarşı heç vaxt oynamamışam. Amma 2016-cı ildə Portuqaliya millisi ilə Avropa çempionu və 2018-2019-cu illər mövsümündə Millətlər Liqasının qalibi olub. Çox uğurlu mütəxəssisdir. Bilirəm, hazırda nəticələr ürəkaçan deyil, lakin baş məşqçiyə bir az vaxt verilsə, nəticə əldə etmək olar.
- Azərbaycanlı futbolçulardan kimləri tanıyırsınız?
- Mahir Emrelini tanıyıram, çox istedadlı futbolçudur. Beynəlxalq arenada kifayət qədər yaxşı təcrübəyə malikdir. “Nürnberq”in heyətində əla mövsüm keçirdi. Cənubi Koreyada Anton Krivotsyuka qarşı oynamışam. Onu yaxşı və sərt sol cinah müdafiəçisi kimi xatırlayıram. Ardıcıl üç mövsüm güclü liqalarda oynaması çox şeydən xəbər verir. Azərbaycan milli komandasına gələcək oyunlarda uğurlar arzulayıram. Müsahibəyə görə isə ayrıca təşəkkür edirəm.
Bölmənin digər xəbərləri
