Mahir Abbaszadə: Qalib Azərbaycan Ordusu tarixi missiyasının öhdəsindən şərəf və ləyaqətlə gəldi
Bakı, 26 iyun, AZƏRTAC
Prezident, Müzəffər Ali Baş Komandan İlham Əliyevin yürütdüyü siyasətin əsas hədəfi Ermənistanın işğalı altındakı ata-baba torpaqlarımızı azad etmək və Azərbaycanın bütövlüyünü təmin etmək idi. Dövlətimizin başçısı hələ 2003-cü ildə keçirilən prezident seçkilərində xalqa verdiyi vədi 44 günlük Vətən müharibəsində yerinə yetirdi. Verilən vədə, sözə əməl etmək üçün müəyyən zaman kəsiyi və hazırlıq lazım idi. Vahid məqsədə doğru bütün işlər daxildə və xaricdə düşünülmüş və planlı şəkildə aparıldı. Azərbaycan həqiqətlərinin dünyaya çatdırılması, erməni yalanın ifşası istiqamətində məqsədyönlü iş görüldü. Prezident İlham Əliyev iştirak və çıxış etdiyi beynəlxalq platformalardan ölkəmizin haqq səsini dünyaya çatdırdı. Çünki informasiya müharibəsinin aparılması bu prosesdə çox vacib idi. Azərbaycan Ermənistana ilk növbədə informasiya müharibəsində qalib gəldi. Hər bir azərbaycanlı ümumi iş uğrunda birləşdi, həmrəy oldu. Məhz bu birliyin, həmrəyliyin qarşısında düşmən tab gətirə bilmədi və təslim oldu.
Bu fikirləri Milli Məclisin deputatı Mahir Abbaszadə AZƏRTAC-a açıqlamasında deyib.
Deputat bildirib ki, Azərbaycan Ordusunun sentyabrın 27-də başlayan əks-hücum əməliyyatları noyabrın 8-də Qarabağın gözü olan Şuşanın igid oğullarımızın şücaəti sayəsində azad edilməsi və düşmənin noyabrın 9-dan 10-na keçən kapitulyasiya aktına imza atması ilə nəticələndi. Vətən müharibəsində Qələbəni şərtləndirən əsas amillər iqtisadi güc, qüdrətli ordu, milli həmrəylik, beynəlxalq səviyyədə uğurların təmin edilməsidir. Bu mühüm amilləri təmin və təşkil edən, bütün resursları vahid amal uğrunda səfərbər etməyi bacaran Prezident, Müzəffər Ali Baş Komandan İlham Əliyev Azərbaycanın qüdrətini dünyaya nümayiş etdirdi. Vətən müharibəsindəki Zəfərimiz ölkəmizin siyasi və iqtisadi cəhətdən güclü olduğunu, hərb sahəsində sürətlə inkişaf etdiyini sərgilədi”.
Prezident İlham Əliyevin rəhbərliyi ilə güclü dövlət quruculuğu strategiyasının uğurla reallaşdırılması, böyük iqtisadi potensialın və maliyyə imkanlarının yaradılması müasir ordu quruculuğu və hərbi məsələlərin yüksək səviyyədə həll edilməsinə imkan yaratdı. Bu məqsədlə hər il dövlət büdcəsində müdafiə xərclərinə böyük vəsait ayrıldı, ölkənin müdafiə sənayesi yaradıldı, ordumuz ən müasir silahlarla təchiz edildi. Məhz bunun nəticəsidir ki, Azərbaycan Ordusu dünyanın ən güclü 50 ordusu sırasında yer alır. Düşmənlə üz-üzə hərb meydanında Zəfər qazanmağımızın səbəblərindən bir də məhz bu amildir.
M.Abbaszadə vurğulayıb ki, Vətən müharibəsi Azərbaycan xalqının şanlı qürur tarixidir. İkinci Qarabağ müharibəsi bizi daha da birləşdirdi, xalqın öz dövlətinə, ordusuna inamını daha artırdı. Hər kəs orduya yazılmağa, ön cəbhədə döyüşməyə can atırdı. Biz Vətən müharibəsi dövründə Azərbaycan hərbiçisinin rəşadətinin, qarşısına qoyulan bütün döyüş tapşırıqlarını şərəflə, dəqiqliklə yerinə yetirməsinin şahidi olduq.
Deputat qeyd edib ki, Azərbaycan dövləti Vətən müharibəsində canını fəda edən şəhidlərimizin ailələrinin, qazilərin problemlərini, hərbçilərimizin sosial-məişət məsələlərini daim diqqətdə saxlayır. Hərbçilərin sosial müdafiəsinin gücləndirilməsi, onların rifahının yüksəldilməsi istiqamətində ardıcıl şəkildə həyata keçirilən tədbirlər daim diqqətdə saxlanılır. Azərbaycan Respublikası Prezidentinin iyunun 24-də imzaladığı sərəncamlarla 76 mindən artıq hərbiçinin orden və medallarla təltif olunması, iyunun 25-də isə onlara maaşlarının 20-60 faizi həcmində əlavələrin nəzərdə tutulması bu diqqət və qayğının bariz göstəricisidir. Bundan əvvəlki dövrdə də hərbçilərin mənzil-məişət problemlərinin həlli, onların xidmət şəraitinin müasir standartlara uyğun yenidən qurulması, maaşlarının yüksəldilməsi istiqamətində mütəmadi işlər görülüb və proses davamlı şəkildə aparılır”.
“Azərbaycan Ordusu tarixi missiyasını uğurla həyata keçirdi. Bu gün qalib Azərbaycan dövləti, Ordusu və xalqı var. Azərbaycan qalib ölkə olaraq inkişaf edəcək və daha qüdrətli dövlət olacaq”, - deyə M.Abbaszadə bildirib.
Bölmənin digər xəbərləri
