Mahir Məmmədov: FIDE Azərbaycanda rəsmi turnirlərin daha çox keçirilməsində maraqlıdır
Bakı, 28 iyun, AZƏRTAC
Bakıda FIDE və Avropa Şahmat İttifaqının iclasları keçirilib. Bu gün isə şahmat üzrə növbəti nüfuzlu tədbir - FIDE-nin Prezident Şurasının iclası işə başlayıb. Bu cür mühüm tədbirlərin ölkəmizdə təşkili Azərbaycanın şahmat aləmində yüksək nüfuzunun, ölkəmizdə idmanın bu növünə marağın, diqqət və qayğının göstəricisidir.
Bunu FIDE-nin və Azərbaycan Şahmat Federasiyasının vitse-prezidenti Mahir Məmmədov iyunun 28-də jurnalistlərə müsahibəsində deyib.
FIDE-nin Azərbaycanda daha çox rəsmi turnirin keçirilməsində maraqlı olduğunu vurğulayan M.Məmmədov bildirib: “Ötən il FIDE-nin Batumidə keçirilmiş iclasında Arkadi Dvorkoviç qurumun yeni prezidenti seçilib. Bundan sonra kadr dəyişikliyi oldu və bildiyiniz kimi, mən FIDE-nin vitse-prezidenti seçildim. Hazırda qurumun yeni heyəti Bakıda məhsuldar fəaliyyətə başlayıb. İclasda bir sıra mühüm məsələlərin müzakirəsi nəzərdə tutulub. FIDE Azərbaycanda daha çox rəsmi turnirlərin keçirilməsində maraqlıdır və bununla bağlı məsələ də müzakirə olunur”.
Qeyd edək ki, Bakıda FIDE Prezident Şurasının iclası keçirilir.
Bölmənin digər xəbərləri
