CƏMİYYƏT
Maştağada çiyələk yetişdirilən istixanada monitorinq aparılıb
![Maştağada çiyələk yetişdirilən istixanada monitorinq aparılıb](/files/2023/1/1200x630/16783729982300740891_1200x630.jpeg)
Bakı, 9 mart, AZƏRTAC
Azərbaycan Respublikasının Qida Təhlükəsizliyi Agentliyi tərəfindən zərərli orqanizmlərin vaxtında aşkarlanması və ölkə ərazisində yayılmasının qarşısının alınması məqsədilə mövsümə uyğun olaraq istixanalarda fitosanitar monitorinqlər davam etdirilir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, monitorinqlər çərçivəsində agentliyin Bakı regional bölməsinin fitosanitar müfəttişləri tərəfindən Sabunçu rayonunun Maştağa qəsəbəsinin Subtropik Sovxoz ərazisində yerləşən, fiziki şəxs İskəndər Rasim oğlu Qurbanova məxsus çiyələkyetişdirmə istixanasında fitosanitar müşahidələr aparılıb. Müşahidələr zamanı çiyələk şitillərindən nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub. Müayinələr nəticəsində hər hansı uyğunsuzluq halı müəyyən edilməyib.
Monitorinq zamanı təsərrüfat sahibi ilə təsərrüfatda çalışan işçilər çiyələk bitkisinin əsas xəstəlik və zərərvericiləri haqqında məlumatlandırılıb. Həmçinin onlara “İstixanalarda zərərli orqanizmlərin idarə olunmasına dair Təlimat”da göstərilən tədbirlərin icrası və pestisidlərlə işləyən zaman təhlükəsizlik qaydalarına əməl olunması ilə əlaqədar müvafiq istiqamət verilib.