MDB ONKOLOQLARI VƏ RADİOLOQLARININ IV QURULTAYI BAŞLANMIŞDIR
Qurultay öz işinə Azərbaycan Tibb Universitetinin akt salonunda geniş mühazirələrlə başladı. Görkəmli Rusiya alimləri – Rusiya Tibb Elmləri Akademiyasının akademiki Nikolay Napalkovun və həmin akademiyanın müxbir üzvü Vladimir Semiqlazovun onkologiyanın və süd vəzisi xərçənginin endokrin terapiyasının sosial problemləri mövzusunda mühazirələri dinlənildi.
Sonra satellit simpoziumlar keçirildi. Simpoziumları dünyanın tanınmış əczaçılıq şirkətlərinin nümayəndələri aparırdı.
Qurultay çərçivəsində ATU-da “Onkologiya-2006” beynəlxalq ixtisaslaşdırılmış sərgi də açılmışdır. Burada yeni nəsil dərman preparatları, müxtəlif ölkələrin onkoloqlarının elmi əsərləri nümayiş etdirilir.
X X X
Elə həmin gün Azərbaycan Dövlət Akademik Opera və Balet Teatrında qurultayın təntənəli açılış mərasimi oldu.
Azərbaycanın dövlət himni səsləndi.
MDB onkoloqları və radioloqlarının 4-cü qurultayının sədri, respublika Səhiyyə Nazirliyinin Milli Onkologiya Mərkəzinin baş direktoru, Azərbaycan Milli Elmlər Akademiyasının və Rusiya Tibb Elmləri Akademiyasının (RTEA) akademiki Cəmil Əliyev mərasimdə çıxış edərək iştirakçıları salamladı. O vurğuladı ki, beynəlxalq əməkdaşlıq və birgə tədqiqatlar aparmaq və xərçəng xəstəliyinin profilaktikası və müalicəsinə dair səmərəli proqramlar hazırlamaq üçün səylərin birləşdirilməsi onkoloji xəstəliklərlə bağlı problemlərin həllində ən təsirli yollardan biridir. MDB ölkələrində bu problemin həlli sahəsində xeyli təcrübə toplanmışdır, onlar xərçəng xəstəliyinə qarşı tədbirlərin təşkili üzrə nadir sistemə, Birlik çərçivəsində öz fəaliyyətlərini inteqrasiya etmək üçün imkanlara malikdir.
C.Əliyev bildirdi ki, qurultay MDB Onkologiya, Radiologiya və Rentgenologiya Mərkəzləri və İnstitutları Direktorları Assosiasiyasının himayəsi ilə keçirilir. Bu Assosiasiya 15 il əvvəl görkəmli alim, Rusiya Elmlər Akademiyasının və RTEA-nın akademiki Nikolay Trapeznikovun təşəbbüsü ilə yaradılmışdır. Əvvəlki üç qurultay elmi əlaqələri bərpa etməyə, onkoloji xəstəliklərin profilaktikası və müalicəsi yolları barədə fəal fikir mübadiləsi aparmağa imkan vermişdir.
Azərbaycan onkoloqları üçün indiki qurultay əlamətdar hadisədir. Belə ki, Milli Onkologiya Mərkəzi yaradılmasının 65 ili tamam olur. Akademik Cəmil Əliyev dedi ki, Mərkəzin kollektivinin bədxassəli yenitörəmə şişlər olan xəstələrə yardım göstərilməsində qazandığı uğurlar məhz ölkə Prezidenti İlham Əliyevin səhiyyə sahəsinə diqqəti sayəsində mümkün olmuşdur. O, qurultayın keçirilməsinə dəstəyinə görə dövlətimizin başçısına təşəkkür etdi.
Baş nazirin müavini Elçin Əfəndiyev Azərbaycan Prezidentinin qurultay iştirakçılarına təbrikini oxudu.
Açılış mərasimində çıxış edən MDB-nin İcraiyyə Komitəsinin sədri–icraçı katibi Vladimir Ruşaylo qurultay iştirakçılarını MDB İcraiyyə Komitəsi adından salamladı və onlara postsovet məkanında ölüm və əlillik halları statistikasında ikinci yeri tutan xərçəng xəstələrinin müalicəsi yollarının axtarışında uğurlar arzuladı. O, MDB ölkələri onkologiya və tibbi radiologiya problemləri üzrə Əlaqələndirmə Şurası çərçivəsində bu istiqamətdə dövlətlərarası əməkdaşlığı gücləndirməyin zəruriliyini diqqətə çatdırdı. V.Ruşaylo Hökumət Başçıları Şurasının müzakirəsinə çıxarIlması üçün onkoloji xəstəliklərin qarşısının alınması sahəsində MDB ölkələrinin razılaşdırılmış tədbirlərinin vahid Konsepsiyasının qəbul olunmasını sürətləndirməyi təklif etdi. O dedi ki, MDB İcraiyyə Komitəsi bu konsepsiyanın səmərəli surətdə həyata keçirilməsi üçün öz tərəfindən səylərini əsirgəməyəcəkdir. V.Ruşaylo belə mötəbər tibbi forumu Bakıda təşkil etmək imkanına görə Azərbaycan rəhbərliyinə minnətdarlığını bildirdi.
Rusiya Tibb Elmləri Akademiyasının prezidenti, Onkologiya, Radiologiya və Rentgenologiya Mərkəzləri və İnstitutları Direktorları Assosiyasiyasının prezidenti, N.Bloxin adına Rusiya Onkoloji Elmi Mərkəzinin baş direktoru, akademik Mixail Davıdov Azərbaycan dövlətinin başçısı İlham Əliyevin himayədarlığı ilə keçirilən bu qurultayın tarixi əhəmiyyətini vurğuladı.
O, zəmanəmizin görkəmli onkoloqlarının, dünya şöhrətli alimlər Nikolay Trapeznikovun və Nikolay Bloxinin portretlərini ölkəmizin Milli Onkologiya Mərkəzinə hədiyyə etdi.
Azərbaycan Milli Elmlər Akademiyasının prezidenti, akademik Mahmud Kərimov da iştirakçıları qurultayın işə başlaması münasibətilə təbrik etdi və onun ölkəmizin elmi həyatında mühüm hadisə olacağına əminliyini söylədi.
Rəsmi hissədən sonra incəsənət ustalarının konserti oldu.
Bölmənin digər xəbərləri
