Mədəniyyətin yeni fəaliyyət paradiqmaları müzakirə olunub
Bakı, 23 aprel, AZƏRTAC
Formalaşan yeni reallıq və bu səbəbdən meydana gələn müxtəlif sosial-siyasi, habelə iqtisadi təzahürlər mədəniyyət sahəsinə də təsir etməyə bilməz. Təhlükəli halların qarşısının alınması və mövcud sahənin davamlı inkişafının təmin olunması məqsədilə mövcud sahədə çalışan əməkdaşlarda yeni peşə səriştələrinin formalaşmasını qaçılmaz edir. Qısa müddət ərzində mədəniyyət müəssisələri əhaliyə təqdim edə biləcək yeni növ xidmətlər formalaşdığı halda müəssisələrin sosial aktuallığın qorunması mürəkkəb vəzifəyə çevrilə bilər. Qeyd olunanlar fəaliyyətin əlaqələndirilməsini və yeni metodiki üsulların müəyyən olunmasını tələb edir.
AZƏRTAC xəbər verir ki, aprelin 23-də kreativ səriştələrin əməkdaşlar arasında yayılması və yeni peşə təfəkkürün formalaşması məqsədilə növbəti layihə reallaşıb. Belə ki, Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təşkilatçılığı ilə Mədəniyyət İşçilərinin I Ümumrespublika Metodiki Vebinarı keçirilib.
Nazirliyin 15 Regional Mədəniyyət idarəsinin təmsilçilərinin iştirakı ilə keçirilmiş videoseminar zamanı virtual xidmətlər, yeni səriştələr, mədəniyyət siyasəti, mədəniyyətin təbliğində yeni texnologiyaların rolu, fəaliyyətin qiymətləndirilməsində yeni meyarları və sair bu kimi aktual məsələlər ətrafında fikir mübadilələri aparılıb.
Vebinar çərçivəsində elmi katib Cavid Əliyev yeni dövr üçün artıq bir neçə il öncədən mərkəz tərəfindən müxtəlif ilkin addımların atılması, 2015-ci ildə Gənc Mədəniyyət İşçilərinin Koordinasiya Kreativ Qrupunun yaradılması, sosial təcridəqədərki dövrdə təşkil olunan konfrans və seminarlarda “gələcək konsepsiyalara dair” mövzuların müzakirə olunmasını yeni çağırışlara nisbətən hazırlıq kimi qiymətləndirib.
Mərkəzin Metodiki iş şöbəsinin İncəsənət sahəsi ilə iş sektorunun müdiri Nadir Məmmədov sosial təcrid dövründə cəmiyyətin yüksək əhval-ruhiyyəsinin qorunub saxlanılması üçün mədəniyyət işçilərinin üzərinə düşən məsuliyyətdən söhbət açıb.
Vebinarda iştirak edən mədəniyyət işçilərindən Sumqayıt Regional Mədəniyyət İdarəsi 4 saylı diyarşünaslıq klubunun metodisti Səadət Nəcəfova və Sabirabad Regional Mədəniyyət İdarəsinin məsləhətçisi Telman Əzimov da öz təcrübəsindən və karantin dövrünün daha səmərəli keçirilməsindən bəhs ediblər.
Mərkəzin direktoru Asif Usubəliyev təşkil olunan vebinarın əhəmiyyətindən danışarkən nazirlik tərəfindən mövcud istiqamətdə görülən işlər haqqında geniş məlumat verib. Xüsusi olaraq postkoronavirus dövründə mədəniyyətin öz sosial və siyasi aktuallığının qorunması üçün görə biləcək işlər ətrafında diskussiya yaranıb.
Vebinarın yekununda mövzu ətrafında müzakirələr aparılıb.
Bölmənin digər xəbərləri
