Media: Çinli hakerlər Tramp və Vansın telefon məlumatlarını əldə etməyə çalışıblar
Vaşinqton, 26 oktyabr, AZƏRTAC
Çin tərəfindən dəstəkləndiyi iddia olunan hakerlərin ABŞ-ın keçmiş prezidenti Donald Tramp və senator Ceyms Devid Vansın istifadə etdiyi telefonlara və sosial şəbəkələrə müdaxilə etməyə cəhd etməsi ilə bağlı məlumatlar yayılıb.
AZƏRTAC-ın “New York Times”a istinadən verdiyi məlumata görə, kiberəməliyyatın oğurlaya biləcəyi məlumatlar hələ ki, qeyri-müəyyən olaraq qalır. Bildirilib ki, Tramp kampaniyasına namizədlərin istifadə etdiyi telefonların kibercinayətin hədəfi ola biləcəyi barədə xəbərdarlıq edilib.
Başqa mənbə CNN-ə açıqlamasında çinli hakerlərin, həmçinin Harris-Valz kampaniyası ilə əlaqəli insanları və Bayden administrasiyasının yüksəkvəzifəli məmurlarını da hədəfə aldığını bildirib.
Federal Təhqiqatlar Bürosu və Kibertəhlükəsizlik və İnfrastruktur Təhlükəsizliyi Agentliyinin (CISA) yaydığı birgə məlumatda ABŞ hökumətinin Çin Xalq Respublikası ilə əlaqəli aktyorlar tərəfindən kommersiya, telekommunikasiya infrastrukturuna icazəsiz girişinin araşdırıldığı açıqlanıb. Bəyanatda ehtimal olunan kibercinayətin qurbanlarının adları qeyd olunmayıb. Tramp kampaniyasının sözçüsü haker hücumunda demokratları günahlandırıb və bunun Donald Trampın Ağ evə qayıtmasının qarşısını almaq cəhdi olduğunu iddia edib.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
